ڈائریکٹر امن فاؤنڈیشن خاقان سکندر کا کہنا ہے کہ ایمبولینس سروس فنڈز نہ ملنے کے باعث بند کی گئی ہے۔

تفصیلات کے مطابق شہر قائد میں ایمبولینس سروس بند کیے جانے پہ ڈائریکٹر امن فاؤنڈیشن سروسزکی جانب سے موقف پیش کیا گیا کہ محکمہ صحت کی جانب سے فنڈز نہ ملنے کے باعث ایمبولینس سروس  مجبوراً بند کی گئی ہے،جیسے ہی فنڈز ملیں گے، ایمبولینس سروس بحال کر دی جائے گی۔

انہوں نے کہا کہ محکمہ صحت پر امن فاؤنڈیشن کے 412 ملین روپے واجب الادا ہیں ،امید ہے چند روز میں فنڈز جاری کر دیےجائیں گے۔

ڈائریکٹر امن امن فاؤنڈیشن کا کہنا تھا کہ فنڈز کی بروقت ادائیگی نہ ہونے سے فلیٹ میں بتدریج کمی کی جاتی رہی اور کل مکمل طور پر سروس بند کر دی گئی۔

خاقان سکندر نے مزید کہا کہ صوبائی حکومت اور محکمہ صحت سے مکمل رابطے میں ہیں، فنڈز ملتے ہی گھنٹوں میں سروس بحال کر دی جائے گی۔

واضح رہے کہ گزشتہ روز امن فاؤنڈیشن کی جانب سے کراچی میں ایمبولینس سروس اچانک بند کردی گئی تھی۔

امن فاؤنڈیشن اور محکمہ صحت کے درمیان رواں سال مئی میں 45 کروڑ روپے سالانہ میں معاہدہ طے پایا تھا۔ معاہدے کے تحت امن فاؤنڈیشن کی 60 ایمبولینس سندھ ریسکیو اینڈ میڈیکل سروسز میں چلنا تھیں۔