روسی حکام کی جانب سے پیر کے روز روس میں کورونا وائرس کے نئے کیسز میں تیزی سے اضافہ رپورٹ کیا گیا ہے۔

روس کی ریاستی کورونا وائرس ٹاسک فورس نے گزشتہ 24 گھنٹوں میں 30726 نئے انفیکشنز رجسٹرد جو گزشتہ ہفتے کے مقابلے میں دُگنے ہیں اور دسمبر کے شروع کے بعد سے ایک دن میں سب سے زیادہ کیسز ہیں۔

ٹاسک فورس نے 670 اموات بھی رپورٹ کی ہیں۔

اومیکرون ویریئنٹ، کورونا وائرس کے دیگر ویریئنٹ کے نسبت تیزی اور آسانی سے پھیلتا ہے اور منظر پر آنے کے بعد سے اس نے کئی ممالک کو اپنی شدید لپیٹ میں لے لیا ہے۔

یہ ان افراد کو بھی آسانی سے اپنی لپیٹ میں لے لیتا ہے جنہوں نے ویکسین لگوالی ہے یا گزشتہ ویریئنٹ سے متاثر ہو چکے ہیں۔

تاہم ابتدائی تحقیقوں سے یہ معلوم ہوا ہے کہ اومیکرون اس سے گزشتہ یعنی ڈیلٹا ویریئنٹ کی نسبت کم شدت کی بیماری کا سبب بنتا ہے۔

روس میں گزشتہ ہفتے انفیکشنز کی تعداد بتدریج بڑھتی ہی گئی ہے اور حکام نے اومیکرون کے فوری پھیلنے کی خصوصیت کی وجہ سے کیسز میں تیزی سے اضافے کی خطرے کی گھنٹی بجا دی ہے۔

روس کے عوامی صحت کے نگراں ادارے کی سربراہ اینا پوپووا نے خبردار کیا ہے کہ روزانہ کے نئے کیسز کی تعداد چھ ہندسوں تک پہنچ سکتی ہے۔

روسی صدر ولادمیر پیوٹن نے کہا ہے کہ روس کے پاس ریکارڈ کیسز کے اضافے کے لیے تیار ہونے کے لیے دو ہفتے ہیں۔

ماسکو کے میئر سرگئی سوبیانِن نے جمعے کو کہا تھا کہ دارالحکومت میں نصف سے زیادہ نئے کیسز کا ذمہ دار اومیکرون ہے۔

پیر کے روز ماسکو میں نئے کیسز کی تعداد 7000 سے تجاوز کر گئی۔