امریکا میں بائیڈن انتظامیہ آئندہ ہفتے سے 40 کروڑ این 95 ماسک مفت میں تقسیم کرے گی۔ یہ اقدام وفاق کی جانب سے اومیکرون ویریئنٹ سے بہتر طور پر تحفظ فراہم کرنے کے لیے اٹھایا جا رہا ہے۔

وائٹ ہاؤس کی جانب سے بدھ کے روز کیے جانے والے اعلان کے مطابق یہ ماسک حکومت کے اسٹریٹیجک قومی ذخیرے سے آئیں گے، جس میں 75 کروڑ سے زیادہ اعلیٰ تحفظ فراہم کرنے والے ماسک موجود ہیں۔

ماسک ملک بھر میں فارمیسیز اور کمیونیٹی کے ہیلتھ سینٹرز پر دستیاب ہوں گے۔

وائٹ ہاؤس کے مطابق حکومت اس ہفتے ماسک کی شِپنگ شروع کرے گی جو آئندہ ہفتے کے آخر میں تقسیم کیے جائیں گے۔

اتنے بڑے پیمانے پر مفت ماسک کی تقسیم کووڈ-19 کی عالمی وباء کے شروع ہونے کے بعد سے پہلی بار کی جارہی ہے۔

2020 کے شروع میں اس وقت کے صدر ڈونلڈ ٹرمپ کی انتظامیہ نے اس کے متعلق سوچا اور بعد ازاں مفت ماسک کی تقسیم کے منصوبوں کو بالائے طاق رکھ دیا گیا۔

موجودہ امریکی صدر جو بائیڈن نے ملک میں تیزی سے بڑھتے اومیکرون کے دوران ماسک کی عدم دستیابی پر تنقید کا سامنا کرنے کے بعد امریکیوں میں مفت ماسک کی تقسیم کے خیال پر عمل کیا۔

موسمِ سرما میں کووڈ-19 کی ہوم ٹیسٹ کِٹس میں کمی ہونے پر تنقید کا شکار ہونے کے بعد بائیڈن نے اس ہفتے ایک ویب سائٹ لانچ کی جس پر امریکی فور طور پر چار کِٹس آرڈر کر سکتے ہیں۔