منہ کی صحت سے جڑی ہے آپ کی مجموعی صحت، اسی لیے اس کی صحت اور صفائی کا خاص خیال رکھنا بے حد ضروری ہے۔

منہ کی صحت اور صفائی کا خیال رکھنے کے لیے جہاں ایسی غذاؤں سے اجتناب ضروری ہے جو منہ، دانتوں اور مسوڑھوں کے لیے نقصان کا باعث بنتی ہیں اسی طرح دانتوں کو برش کرنا اور اچھے ماؤتھ واش کا استعمال بھی لازمی ہے۔

منہ کی صفائی میں ماؤتھ واش بہت اہم کردار ادا کرتا ہے، یہ آپ کے دانتوں کی صفائی کرتا ہے، مختلف وائرس سے دانتوں کے محفوظ رکھتا ہے، جراثیم سے منہ کے حفاظت کرتا ہے اور بیکٹیریا کے پیدا ہونے کے خدشے کو کم کرنے میں بھی مدد فراہم کرتا ہے۔ واضح رہے کہ ماؤتھ واش میں دیگر کئی اجزاء کے ساتھ الکحل ایک بنیادی جز ہوتا ہے۔

تاہم یہاں پر ماؤتھ واش کے مفید یا مضر ہونے کے بارے میں بات کی جارہی ہے اور ماہرین منہ کو صحت مند رکھنے والے اس محلول کو کیوں مضر قرار دے رہے ہیں۔

لاکوا اے واکرونسن جو کہ منہ کی صحت کے ماہر ہیں کا کہنا ہے کہ ماؤتھ واش میں موجود الکحل پرنظر ثانی کرنے کی ضرورت ہے، کیونکہ یہ منہ میں لعاب (تھوک) کی پیداوار میں کمی کا سبب بن سکتا ہے اور یہ کمی کئی مسائل کا پیش خیمہ ثابت ہوسکتی ہے۔ جبکہ ایک تحقیق کے مطابق ماؤتھ واش دانتوں پر کئی طرح کے داغ یا نشانات کا باعث بھی بنتے ہیں۔

ماؤتھ واش کے استعمال کا سب سے خطرناک پہلو یہ ہے کہ یہ منہ کے اچھے اور برے دونوں طرح کے بیکٹیریا کو کم کر دیتا ہے جس سے منہ میں کئی طرح کے انفیکشن جنم لے سکتے ہیں۔

ماؤتھ واش کے مضر صحت پہلو کے قطع نظر، ایسا ماؤتھ واش استعمال کریں جس میں الکحل کے بجائے فلورائیڈ موجود ہو، فلورائیڈ دانتوں کو کمزور ہونے سے بچانے کے ساتھ منہ کے خراب یا مضر بیکٹیریا کی پیداوار کو کم کرنے میں مدد فراہم کرے گا۔