ذہنی امراض کے شکار افراد میں کس جان لیوا بیماری کا خطرہ بڑھ جاتا ہے اس حوالے سے نئی تحقیق نے سب کو چونکا دیا ہے۔

ایک حالیہ تحقیق کے مطابق کسی بھی ذہنی بیماری کا سامنا کرنے والے افراد میں ہارٹ اٹیک یا فالج جیسے جان لیوا امراض کا خطرہ بڑھ جاتا ہے۔

تحقیق میں جنوبی کوریا سے تعلق رکھنے والے 20 سے 39 سال کی عمر کے 65 لاکھ سے زائد افراد کے انشورنس ڈیٹا کا تجزیہ کیا گیا تھا۔

ان افراد میں ہارٹ اٹیک یا فالج کی تاریخ نہیں تھی اور تحقیق کے آغاز پر 13 فیصد میں کسی ذہنی بیماری کی تشخیص ہوئی تھی۔

تحقیق کے مطابق ڈپریشن، انزائٹی یا دیگر ذہنی امراض کا سامنا کرنے والے افراد میں اگلے 8 برسوں کے دوران ہارٹ اٹیک یا فالج کا خطرہ نمایاں حد تک بڑھ جاتا ہے۔

محققین نے کہا کہ ذہنی امراض کے شکار افراد میں ہارٹ اٹیک کا خطرہ 58 فیصد جبکہ فالج کا 42 فیصد تک بڑھ جاتا ہے۔

تحقیق میں دریافت کیا گیا کہ ذہنی امراض کی قسم اور ہارٹ اٹیک یا فالج کے خطرے کی شرح مختلف ہوسکتی ہے۔

اسی طرح انزائٹی اور ڈپریشن ایسے ذہنی مسائل ہیں جن سے ہارٹ اٹیک اور فالج دونوں کا خطرہ نمایاں حد تک بڑھ جاتا ہے۔

محققین کا کہنا ہے کہ نتائج سے ثابت ہوتا ہے کہ کسی بھی ذہنی عارضے کے شکار جوان افراد کو ہارٹ اٹیک اور فالج جیسے امراض کے حوالے سے خبردار رہنا چاہیے۔

انہوں نے مزید کہا کہ اس حوالے سے جائزہ لینا ہوگا کہ ذہنی مسائل کی روک تھام سے دل کی شریانوں کی صحت کو کتنا فائدہ ہوتا ہے۔