ماہرین نے خبردار کیا ہے کہ اگر آپ غذا کو ڈیپ فرائی کرنے کے لیے بار بار ایک ہی تیل استعمال کررہے ہیں یا اسے بدلنے میں کوتاہی کررہے ہیں تو اس سے دماغی اور قلبی امراض لاحق ہوسکتے ہیں۔

اگرچہ اس کے تجربات چوہوں پر کئے گئے ہیں لیکن ماہرین کہتے ہیں کہ استعمال شدہ تیل بدن میں جاکر آکسیڈیٹو اسٹریس اور اندرونی جلن یا سوزش (انفلیمیشن) کی وجہ بنتےہیں۔ اس سے اعصابی تنزلی، دل کے امراض اور دیگر بیماریوں کے خطرات بڑھ جاتے ہیں۔

پھر یہ بھی کہا گیا ہے کہ معدہ، جگر اور دماغ کی تکون اگر توازن میں رہے تو انسان تندرست رہتا ہے لیکن استعمال شدہ پکانے کا تیل اسے شدید متاثر کرتا ہے۔ یہی وجہ ہے کہ تلے ہوئے کھانوں سے ماہرین نے خبردار کیا ہے۔

الزائمر سے متعلق 2024 کی رپورٹ ‘ڈسکور بی ایم بی 2024’ کے نام سے شائع ہوئی ہے۔ اس کی تفصیلات امریکی تنظیم برائے بایوکیمسٹری اور مالیکیولر بایولوجی کے سالانہ اجلاس میں پیش کی گئی ہے۔

ماہرین نے چوہوں کے دو گروہوں کو لیا جن میں سے ایک کو بار بار استعمال ہونے تیل کی ایک ہی مقدار میں پکائی گئی غذائیں کھلائی۔ دوسرے گروہ کے چوہوں کے لیے تیل بدلا گیا۔ معلوم ہوا کہ تیل کو بار بار گرم کرنے اور کھولانے سے وہ جان کا دشمن بن سکتا ہے۔ پہلے گروہوں کے چوہوں کے دماغ میں خلل واقع ہوا اور ان میں کئی دماغی امراض پیدا ہونے لگے یا ایسے اجزا بڑھے جو اس مرض کی وجہ بنتے ہیں۔

اس سے قبل بھی ماہرین کہہ چکے ہیں کہ بار بار تیل کو استعمال کرنے سے کئی اقسام کے سرطان بھی لاحق ہوسکتے ہیں۔