وزارت مذہبی امور کی جانب سے حج درخواست گزاروں کو واجبات واپس لینے کی ہدایات دوبارہ جاری کردیں گئیں۔
ترجمان وزارت مذہبی امور نے کہا ہے کہ درخواستگزار جلد سے جلد اپنے واجبات بینکوں سے واپس نکلوالیں، وزارت نے بینکوں میں پیسے رکھنے اور نیا اکاؤنٹ کھلوانے کی کوئی ہدایت جاری نہیں کی۔
ترجمان کے مطابق تمام نامزد بینک بلا کٹوتی تمام واجبات ادا کرنے کے پابند ہیں اور وزارت تمام عازمین حج کو رقوم کی واپسی کیلئے بینکوں سے مسلسل رابطے میں ہے۔
سعودی حکومت کی طرف سے حج محدود کیے جانے کے بعد حج 2020 کے درخواست گزاروں کو واجبات کی ادائیگی 2 جولائی سے شروع ہوئی تھی۔
ترجمان وزارت مذہبی امور کے مطابق وزارت نے سعودی حکومت کے حالیہ فیصلے کے بعد درخواست گزاروں کو واجبات کی ادائیگی کا فیصلہ کرلیا گیا ہے، تمام کامیاب عازمینِ حج کو رقوم واپس کی جائیں گی۔
تمام درخواست گذاروں کو بذریعہ ایس ایم ایس اطلاع دی گئی اور ملک بھر کے نامزد بینکوں سے واجبات کی ادائیگی کا عمل شروع ہوا تھا۔
خیال رہے کہ سعودی عرب کی طرف سے چند روز قبل اعلان کیا گیا تھا کہ اس سال کوئی بیرون ملک سے سعودی عرب آ کر فریضہ حج کی ادائیگی نہیں کرسکے گا جبکہ ملک میں موجود سعودی اور غیر ملکی فریضہ حج ادا کر سکیں گے اور یہ تعداد دس ہزار سے زائد نہیں ہوگی۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News