مسلم لیگ ق کے سربراہ ، سابق وزیراعظم چودھری شجاعت حسین نے کہا ہے کہ وزیر اعظم عمران خان کراچی جائیں، مسائل اور وقت کا تعین کریں اور دیکھیں کہ ان کے احکامات پر عمل ہوا ہے یا نہیں۔

تفصیلات کے مطابق چودھری شجاعت حسین کا کہنا تھا کہ اکثر لوگ کراچی کی صفائی کے مسئلہ پر ہاتھ کی صفائی کو ترجیح دیتے ہیں، اگر صفائی نہیں کر سکتے تو گندگی بھی نہ پھیلائیں، کئی ادوار گزرے، کئی لوگ اقتدار میں آئے اور چلے گئے لیکن کراچی ہمیشہ سیاسی بیان بازی کی نظر ہو جاتا ہے۔

انہوں نے کہا کہ شہر میں گورنر راج بھی رہا میئر اور ایڈمنسٹریڑ بھی تعینات رہے مگر افسوس ایک دوسرے پر الزام تراشی کے سوا کچھ نہیں کیا گیا،سب ایک دوسرے پر الزامات لگا کر بری الذمہ ہوتے رہے

چودھری شجاعت حسین کا مزید کہنا تھا کہ ہمیشہ اقتدار اور اختیارات کا رونا رویا گیا،کراچی کے اہم مسائل میں گندے اور صاف پانی کا مسئلہ نمایاں ہے،صفائی کے مسئلے کو توجہ دی گئی لیکن عملی طور پر شہر کی صفائی کی بجائے اپنی صفائی کو اہمیت دی گئی،اکثر لوگ کراچی کی صفائی کی بجائے ہاتھ کی صفائی دیکھاتے ہیں،یہاں پر اختیارات کا مطلب صرف پیسے ہیں،کبھی صفائی کا مسئلہ کھڑا ہو جاتا ہے،کبھی بارشی پانی کا اور کبھی پینے والے پانی کا لیکن کبھی درست نہیں کیا گیا

چودھری شجاعت حسین کا مزید کہنا تھا کہ میئر کام کرے گا، میئر سے پوچھا جائے تو وہ کہتے ہیں میرے پاس اختیارات نہیں،جس کو صفائی کا موقع دیا جاتا ہے تو سب اپنی صفائی پیش کرنے لگ جاتے ہیں،جب بات حد سے بڑھ جاتی ہے تو پھر فوج کو درخواست کی جاتی ہے کہ وہ آئیں اور جھاڑو پھیرنے کا کہا جاتا ہے،میری تجویز ہے کہ وزیر اعظم خود کراچی میں ایک ہفتہ رہیں اور کراچی کے ہر مسئلے کو خود مانیٹر کریں اور ہدایات جاری کریں۔.