امیر جماعت اسلامی سراج الحق نے کہا ہے کہ پی ٹی آئی اور پی ڈی ایم امریکی ایجنڈے اور آئی ایم ایف کی غلامی پر ہیں۔

تفصیلات کے مطابق امیر جماعت اسلامی سراج الحق نے اپنے ایک بیان میں کہا کہ پی ڈی ایم میں کون لوگ ہیں وہی لوگ ہیں جن کو ماضی میں لوگوں نے آزمایا ۔

امیر جماعت اسلامی نے کہا کہ ہمارے تمام مسائل کا حل ،تعلیم ،بیروزگاری کا حل اللہ اور رسول کے نظام میں ہے ، جماعت اسلامی نے اولیاء کے مشن کو نئے انداز سے اٹھایا ہے، پاکستان کو ہر قیمت پر عظیم پاکستان بنائیں گے۔

سراج الحق نے یہ بھی کہا کہ پاکستان میں غریب کے لیے کوئی انصاف نہیں ہے،کروڑوں لوگوں نے اس ملک کی خاطر جانوں کی قربانیاں دیں، اس قوم کو بریانی اور سونامی کی نہیں بلکہ  ترقی ،خوشحالی اور عدل کی ضرورت ہے۔

امیر جماعت اسلامی کا کہنا تھا کہ یہ کیسا نظام ہے اس ملک میں کچھ لوگوں کے کتے گوشت اور پلاو کھاتے ہیں جبکہ اس کرپٹ اشرافیا نے پاکستان کے نظریے کے ساتھ وفا نہیں کی، آو مل کر ایک اسلامی خوشحال پاکستان بنائیں۔

سراج الحق کا یہ بھی کہنا تھا کہ ایک کروڑ نوجوان وزیراعظم کی تلاش میں ہیں، غریب کا بچہ کوڑے میں رزق تلاش کرتا ہےجبکہ غریب کا بیٹا اگر ڈگری حاصل کر لے تو اس کو نوکری نہیں ملتی ایسے ظلم کے نظام کو میں نہیں مانتا۔

امیر جماعت اسلامی سراج الحق کا مزید کہنا تھا کہ جھوٹ کی بنیاد پر حکومت نہیں چل سکتی، اس وقت جو حکومت پاکستان میں قائم ہے انہوں نے عوام سے کون سے وعدے پورے کیے، یہ سارا نظام فراڈ کی بنیاد پر ہے، عمران خان نے ایک وعدہ بھی پورا نہیں کیا۔