موٹرسائیکل بنانے میں مشہور کمپنی یونائیٹڈ موٹرز نے ایک اور گاڑی متعارف کروا دی۔

تفصیلات کے مطابق یونائیٹڈ موٹرز کی جانب سے متعارف کی جانے والی گاڑی چھوٹی مگر پہلے سے زیادہ طاقتور ہے جسے ‘یونائیٹڈ الفا’ کا نام دیا گیا ہے۔

یونائیٹڈ الفا 2021 میں متعارف کرائی گئی ہے جسے 2021 کی پاکستان کی پہلی گاڑی کا نام بھی دیا گیا ہے۔

پاک وہیلز کی رپورٹ کا کہناہے کہ اس گاڑی کو پاکستان میں ہی بنایا گیا ہے اور یہ پاکستان کے تمام بڑے شہروں میں دستیاب ہوگی۔

یونائیٹڈ الفا میں 993 سی سی کا چار سلینڈر انجن دیا گیا ہے۔1.0 ایل انجن 69 ہارس پاور فراہم کرنے کی صلاحیت رکھتا ہے اور اس میں مینوئل ٹرانسمیشن سسٹم دیا گیا ہے، آٹومیٹک ورژن 2021 کے پہلی ششماہی کے دوران کسی وقت پیش کیا جائے گا۔

یہ گاڑی سوزوکی ویگن آر، سوزوکی کلٹس اور کیا کی پیکانٹو کو براہ راست ٹکر دے گی اور یہ تینوں کے مقابلے میں زیادہ سستی بھی ہے۔

یونائیٹڈ الفا بنیادی طور پرایک چینی گاڑی چیری کیو کیو ہے جسے پاکستان میں الفا کا نام دیا گیا ہے۔

اس گاڑی کے فیچرز میں پاور اسٹئیرنگ، پاور ونڈوز، 13 انچ ایلوئے وہیلز، ایل سی ڈی کیمرا، ریورس کیمرا، اے بی ایس بریک سسٹم اور دیگر قابل ذکر ہیں۔یہ گاڑی پاکستان میں 13 لاکھ 95 ہزار روپے میں فروخت کی جائے گی۔

اس سے پہلے یونائیٹڈ موٹرز نے 2018 کے آخر میں اس وقت کی مقبول سوزوکی مہران کے مقابلے میں اپنی پہلی گاڑی براوو متعارف کرائی تھی، جس میں 800 سی سی انجن دیا گیا تھا۔