حمزہ شہباز نے رمضان میں مہنگائی اور بیروزگاری پر قابو پانے کیلئے فوری حکومتی اقدامات کا مطالبہ کر دیا ہے۔

تفصیلات کے مطابق مسلم لیگ ن کے مرکزی رہنما اور پنجاب اسمبلی میں اپوزیشن لیڈرشہبا ز شریف نے اپنے ایک بیان میں کہاکہ حکومت روزے داروں کی بد دعاؤں سے بچنے کیلئے ہنگامی اقدامات کرے۔

انہوں نے کہا کہ رحمتوں اور برکتوں کے مہینے میں بھی حکومت عوام کو ریلیف فراہم کرنے میں ناکام ہے، سستے بازاروں کے نام پر غیر معیاری اشیاء کی مہنگے داموں فروخت روزے داروں سے سنگین مذاق ہے۔

حمزہ شہباز نے کہا کہ پورے پاکستان بالخصوص پنجاب میں افراتفری مچی ہوئی ہے۔ عوام کا کوئی پرسان حال نہیں، مہنگائی کی تلوار سے عوام کا قتلِ عام جاری ہے اور حکومت خاموش تماشائی بنی ہوئی ہے۔

مسلم لیگی رہنما نے کہا کہ رمضان کے مقدس مہینے کے دوران ناصرف سبزی، پھل اور اشیائے خورد و نوش کی قلت ہے بلکہ مہنگے داموں ان کی فروخت بھی جاری ہے۔

انہوں نے کہا کہ حکومت کم از کم رمضان کے مہینے میں روزے داروں کی بد دعاؤں سے بچنے کیلئے ہنگامی اقدامات کرے۔

حمزہ شہباز نے حکومت پر مزید تنقید کرتے ہوئے کہاکہ عمران نیازی لیکچر بند کرکے ایسے اقدامات کریں جن سے مہنگائی کے ستائے عوام کو ریلیف مل سکے۔