چئیرمین کشمیر کمیٹی شہریار خان آفریدی نے کہا کہ کشمیر پریمئیر لیگ کشمیری نوجوانوں کی صلاحیتوں کو نکھارنے اور کشمیری ثقافت کو دنیا بھر میں اجاگر کرنے کا ذریعہ بنے گی۔

تفصیلات کے مطابق چئیرمین کشمیر کمیٹی شہریار خان آفریدی نے صدر آزاد جموں و کشمیر سردار مسعود خان سے مظفرآباد میں ملاقات کی جس میں شہریار خان آفریدی نے سردار مسعود خان کو کشمیر پریمئیر لیگ کے کامیاب انعقاد پر مبارکباد پیش کی۔

چئیرمین کشمیر کمیٹی شہریار خان آفریدی نے کہا کہ کشمیر پریمئیر لیگ کشمیر کے سافٹ امیج کو دنیا بھر میں متعارف کرنے کا بڑا ذریعہ بنے گی ، کشمیر پریمئیر لیگ کے انعقاد کیلئے انتھک کوششوں پر صدر آزاد کشمیر سردار مسعود خان کا شکریہ ادا کرتا ہوں۔

ذرائع کے مطابق سردار مسعود خان نے شہریار خان آفریدی کو کشمیر پریمئیر لیگ کا آرکیٹیک قرار دیا۔

صدر آزاد جموں و کشمیر سردار مسعود خان نے کہا کہ کشمیر پریمئیر لیگ کشمیر کو عالمی نقشے پر لانے کیلئے شہریار خان آفریدی کا ماسٹر سٹروک ہے جس کیلئے کشمیری قوم شہریار خان آفریدی کی احسان مند رہے گی ، کشمیر پریمئیر لیگ کو کامیاب بنانے کیلئے کشمیر کا ہر بچہ، جوان اور بوڑھا اپنا کردار ادا کرے گا ، ہم ثابت کرینگے کہ کشمیری بہترین مہمان نواز ہیں اور تمام مہمانوں کو بہترین سہولیات اور ماحول فراہم کرینگے۔