وزیراعلیٰ بلوچستان جام کمال خان نے کہا کہ ہیومن ریسورس ڈیویلپمنٹ میں یونیورسٹیوں کا کردار اہمیت کا حامل ہے۔

تفصیلات کے مطابق وزیراعلیٰ بلوچستان جام کمال خان سے یونیورسٹی آف مینجمنٹ اینڈ ٹیکنالوجی (یوایم ٹی) لاہور کے صدر ابراہیم حسن مراد نے ملاقات کی جس میں صوبے میں ٹیکنالوجی کے فروغ، اعلی تعلیم، آرٹیفشل انٹیلیجنس، طلباء کو اسکالرشپ کی فراہمی سمیت مختلف نکات پر تبادلہ خیال کیا گیا۔

وزیراعلیٰ کو صدر یو ایم ٹی نے یونیورسٹی کی تعلیمی و دیگر سرگرمیوں کے بارے میں تفصیلی بریفنگ دی۔

یونیورسٹی آف مینجمنٹ اینڈ ٹیکنالوجی (یوایم ٹی) لاہور کے صدر ابراہیم حسن مراد نے کہا کہ بلوچستان میں یو ایم ٹی سینٹر آف ایکسیلنس قائم کرنا چاہتے ہیں ، ملک میں انوویشن حب اور نالج اکانومی کے فروغ کے لیے کام کر رہے ہیں ، یو ایم ٹی میں پاکستان بھر کے مختلف شہروں خصوصاً بلو چستان کے ہر ضلع سے تعلق رکھنے والے طلباء معیاری تعلیم بہترین اسکالر شپس پر حاصل کر رہے ہیں۔

ابراہیم حسن نے کہا کہ بلوچستان کے سینکڑوں طلبہ تعلیم مکمل کر کے فارغ التحصیل بھی ہو چکے ہیں ، ہائیر ایجوکیشن کے فروغ کے لیے جامعات کو سالانہ ڈھائی ارب روپے کی گرانٹ دے رہے ہیں۔

وزیراعلیٰ بلوچستان جام کمال خان نے کہا کہ بلوچستان کے ہر شعبے میں وسیع مواقع موجود ہیں ، صوبے کے ہر بڑے شہر میں یونیورسٹی کیمپس قائم کررہے ہیں ، کچلاک میں ایجوکیشنل انکلیو قائم کرنے کا منصوبہ زیر غور ہے ، بلوچستان میں تعلیمی صورتحال بہتر کرنے کے لیے یو ایم ٹی جیسے ادارے کے قیام کا خیر مقدم کرتے ہیں اور اس سلسلے میں بلوچستان حکومت اپنا بھرپور تعاون فراہم کرے گی۔