مسلم لیگ (ن) کے رہنما احسن اقبال نے کہا کہ حکومت نے ملک پر معاشی اور اقتصادی تباہی مسلط کر رکھی ہے۔

تفصیلات کے مطابق مسلم لیگ (ن) کے رہنما احسن اقبال نے ماڈل ٹاؤن میں پریس کانفرنس کرتے ہوئے کہا کہ چیئرمین نیب کہتے ہیں کہ فیس نہیں کیس دیکھتا ہوں، شہباز شریف کے خلاف کیس بنایا کہ انہوں نے میرے بھائی کو نوازا ہے۔

انہوں نے کہا کہ قوم کے وسائل کو عوام کی امانت سمجھ کر خرچ کیا، اپنا گھر جلا کر عزت سے سیاست کی، عوام آپ کے جھوٹ کی اصلیت جانتی ہے، ہر فیصلے میں لکھا ہے کوئی کرپشن کا الزام نہیں، قومی امانت کو عوام کی امانت سمجھ کر پیسہ خرچ کیا، روپے کی قدر کم ہونے سے مہنگائی کا طوفان آئے گا۔

احسن اقبال نے کہا کہ چوری ، کرپشن آپ کریں اور الزامات دوسروں پر لگائیں، چیلنج کرتا ہوں 32 روپے کی کرپشن ثابت کردیں، پچھلے 3 سالوں سے کردارکشی کی مہم چل رہی ہے۔

مسلم لیگ (ن) کے رہنما احسن اقبال نے مزید کہا کہ ن لیگ کا دور ملکی تاریخ میں ترقی کا سنہرا دور تھا، ہر پاکستانی کی گردن میں قرض کا بوجھ ڈال دیا گیا، قرضوں کے بوجھ میں ایک ارب سے زائد کا اضافہ ہوگیا، قرضوں کے بوجھ سے کیا عوام کو کوئی ترقی ملی، عوام کو صرف مہنگائی اور بدترین مہنگائی ملی، عوام کی توجہ ہٹانے کیلئے اپوزیشن کے خلاف جھوٹا کیس بنایا جاتا ہے، کل شہباز شریف کے خلاف ایک نیا الزام لگا دیا گیا۔