مشیر تجارت عبدالرزاق داؤد نے کہا کہ پنجاب حکومت نے کاروبار میں آسانیاں پیدا کرنے کیلئے بہترین اقدامات کیے ہیں۔

تفصیلات کے مطابق مشیر تجارت عبدالرزاق داؤد اور صوبائی وزیر صنعت و تجارت میاں اسلم اقبال کی زیر صدارت اجلاس ہوا جس میں صنعت کاروں کو سہولتوں کی فراہمی، صنعتی زونز کی کالونائزیشن ، سیالکوٹ میں انڈسٹریل اسٹیٹ اور ایکسپوسینٹر کے قیام، قائد اعظم بزنس پارک شیخوپورہ کو لنک کرنے کیلئے موٹر وے پر انٹرچینج کی تعمیر، پیڈمک کے انکم ٹیکس ریفنڈ،صنعتی زونز میں گیس اوربجلی کی فراہمی کے مسائل کا جائزہ لیاگیا۔

مشیر تجارت عبدالرزاق داؤد نے کہا کہ صنعتی مراکز کی کالونائزیشن کے عمل کو تیز کرنے کیلئے وفاقی حکومت ہر ممکن تعاون کرے گی ، صنعتی زونز میں بجلی اور گیس کی فراہمی اور صنعت کاروں کے مسائل ترجیحی بنیادوں پر حل کیے جائیں گے ، وفاقی سرمایہ کاری بورڈ اور پنجاب سرمایہ کاری بورڈ مل کر صنعت کارو ں کیلئے ون ونڈو سروس کی سہولت کی فراہمی کا لائحہ عمل طے کریں۔

صوبائی وزیر صنعت و تجارت میاں اسلم اقبال نے کہا کہ ملکی و غیر ملکی سرمایہ کاری کے فروغ کیلئے صنعت کاروں کے مسائل ترجیحی بنیادو ں پر حل کیے جارہے ہیں ، ہر ڈویژنل ہیڈ کوارٹر پر ایکسپوسینٹر کا قیام ضروری ہے ، صنعت کاری کے عمل کو تیز کرکے ہی روزگار کے نئے مواقع پیدا کیے جاسکتے ہیں ،  پنجاب حکومت صنعتی زونز کی سو فیصد آباد کاری یقینی بنانے کی پالیسی پر عمل پیرا ہے۔

ذرائع کے مطابق اجلاس میں سیکرٹری صنعت و تجارت واصف خورشید،چیئرمین پیڈمک سید نبیل ہاشمی، چیئرمین فیڈمک میاں کاشف اشفاق اور متعلقہ افسران نے شرکت کی۔