وزیر اعظم عمران خان نے کہا ہے کہ زمین پر قبضہ مافیا اور تجاوزات کے خلاف ایک عام آدمی کو ریلیف مل سکے گا۔

تفصیلات کے مطابق وزیراعظم عمران خان کی زیر صدارت قومی رابطہ کمیٹی برائے ہاؤسنگ، کنسٹرکشن و ڈویلپمنٹ کا اجلاس ہوا جس میں وزیراعظم عمران خان کو لاہور میں جاری کیڈاسٹرل میپنگ مشق پر بریفنگ دی گئی۔

وزیر اعظم عمران خان کا کہنا تھا کہ متعلقہ حکام لاہور کے اراضی ریکارڈ کو جلد از جلد ڈیجیٹل کرنے کی تکمیل پر توجہ دیں۔

وفاقی وزراء نے وزیر اعظم عمران خان کو بریفنگ دیتے ہوئے کہا کہ  منصوبہ ٹریک پر ہے اور 15 نومبر 2021  تک مکمل ہو جائے گا۔

اجلاس میں وزیراعظم کو وزارت ہاؤسنگ اور ورکس کے تحت مختلف ہاؤسنگ منصوبوں کی پیش رفت سے بھی آگاہ کیا گیا۔

اجلاس میں وزیر اعظم کو بریفنگ دیتے ہوئے  بتایا گیا کہ  وزارت ہاؤسنگ اینڈ ورکس 86،323 ہاؤسنگ یونٹس تعمیر کر رہی ہے، یونٹس کی مجموعی لاگت 463 ارب  روپے ہے۔

اجلاس میں وزیر خزانہ شوکت ترین ، وزیر مملکت برائے اطلاعات و نشریات فرخ حبیب ، وزیراعظم کے معاون خصوصی ڈاکٹر شہباز گل ، گورنر سٹیٹ بینک رضا باقر ، چیئرمین نیا پاکستان ہاؤسنگ اینڈ ڈویلپمنٹ اتھارٹی لیفٹیننٹ جنرل (ر) ) انور علی حیدر اور دیگر متعلقہ سینئر  افسران نے بھی شرکت کی۔