پاکستان مسلم لیگ ن کے سینئر رہنما رانا مشہود احمد خان نے کہا کہ آج لوگوں کو مہنگے داموں بھی معیاری آٹا اور چینی دستیاب نہیں ہے۔

تفصیلات کے مطابق پاکستان مسلم لیگ ن کے سینئر رہنما رانا مشہود احمد خان نے پارٹی سیکرٹریٹ ماڈل ٹاؤن میں پریس کانفرنس کرتے ہوئے کہا کہ مسلم لیگ ن کے ریسرچ ونگ نے 2018 کے انتخابات سے پہلے اور اب عوام کے ساتھ 3 سال جھوٹ بولنے اور میڈیا سمیت عوام کی آواز روکنے پر رپورٹ تیار کی۔

انہوں نے کہا کہ اس حکومت کا زمینی حقائق سے کوئی تعلق نہیں ہے ، اس حکومت کے میگا کرپشن سکینڈلز اور ان پر اداروں کی مجرمانہ خاموشی باعث حیرت ہے ، عمران خان کہتے تھے کہ اشیاء کی قیمتیں بڑھانے سے حکومت نہیں چلانی چاہیے لیکن آج مہنگائی کہاں پہنچ چکی ہے۔

پاکستان مسلم لیگ ن کے سینئر رہنما رانا مشہود احمد خان نے کہا کہ افراط زر دوگنی ہو چکی ہے، کرنٹ اکاؤنٹ خسارہ کہاں سے کہاں پہنچ چکا ہے ، ہم نے اپنے ادوار میں میگا پراجیکٹس شروع کیے تھے لیکن آج تجارتی خسارہ بڑھنے کی کوئی وجہ ہی نہیں ہے۔

رانا مشہود احمد خان نے کہا کہ یہ ملک کو کس طرف لے کر جا رہے ہیں ، آج پنجاب میں 5واں چیف سیکریٹری اور 7واں آئی جی آ چکا ہے ، ہائیر ایجوکیشن کے 9 اور زراعت کے 11 سیکرٹری تبدیل ہو چکے ہیں ، اتنے لوگوں کو بدلنے کے بجائے پرچی والے ایک وزیراعلیٰ کو ہی تبدیل کر کے دیکھ لیں۔

انہوں نے کہا کہ آج ٹرانسفر پوسٹنگ کے ریٹ مقرر ہو چکے ہیں ، آج ملک میں گورننس نام کی کوئی چیز نہیں ہے ، کے پی میں گزشتہ 9 سالوں میں کوئی ایک نیا اسپتال یا یونیورسٹی تک نہیں بنی بلکہ پہلے سے موجود اداروں میں سہولیات ختم کر دی گئی ہیں۔

پاکستان مسلم لیگ ن کے سینئر رہنما رانا مشہود احمد خان نے کہا کہ آج ہم پنجاب حکومت کے 3 سالوں کا پرفارمنس آڈٹ کر رہے ہیں ، انہوں نے تمام سکالرشپس ختم کر دیے ہیں ، چین میں پڑھنے والے 7 ہزار طلبہ و طالبات کا مستقبل داؤ پر لگا ہوا ہے اور حکومت ان کے بارے میں کچھ نہیں کر رہی۔