پاکستان اور نیوزی لینڈ کی  ٹیمیں آج شام ساڑھے چار بجے پنڈی کرکٹ اسٹیڈیم میں ٹریننگ سیشن کا آغاز کرینگی۔

تفصیلات کے مطابق ون ڈے سیریز سے قبل پاکستان اور نیوزی لینڈ کرکٹ اسکواڈز میں شامل تمام ارکان اور  سیریز کیلئے اعلان کردہ میچ آفیشلز کے کورونا ٹیسٹ کی رپورٹس منفی آئی ہیں ،جس کے بعد دونوں ٹیمیں آج پیر کو شام ساڑھے4 بجے پنڈی کرکٹ اسٹیڈیم میں ٹریننگ کریں گی جبکہ پریکٹس سیشن 3 گھنٹے کا ہو گا۔

واضح رہے کہ پاکستان اور نیوزی لینڈ کے درمیان تین ایک روزہ میچز کی سیریز کا پہلا میچ 17 ستمبر کو کھیلا جائے گا جبکہ دوسرا میچ 19 اور آخری میچ 21 ستمبر کو راولپنڈی کرکٹ اسٹیڈیم میں کھیلا جائے گا اور ون ڈے سیریز کے بعد نیوزی لینڈ ٹیم ٹی ٹوئنٹی سیریز کیلئے لاہور روانہ ہو گی۔

یاد رہے کہ ہفتے کے روز قومی کرکٹ ٹیم کے انٹرا اسکواڈ پریکٹس میچ میں ٹیم وائٹ نے  35اوورز میں 4 وکٹوں کے نقصان پر 267رنز بنائے تھے،  کپتان شاداب خان کی 42گیندوں پر جارحانہ 96رنز کی اننگز، فخر زمان 72، افتخار احمد 53رنز بنانے میں کامیاب رہے تھے۔

 اسکے علاوہ عثمان قادر کی 2وکٹیں  جواب میں بابر اعظم کی ٹیم گرین کو صرف 24اوورز ہی مل سکے تھے ، بابر اعظم نے  81رنز کی بدولت 3وکٹوں کے نقصان پر 187 رنز بنائے تھے۔