کراچی کے شہریوں کے لئے بری خبر یہ ہے کہ انہیں آئندہ دنوں میں گیس کی ‏لوڈشیڈنگ کا سامنا کرنا پڑ سکتا ہے۔

تفصیلات کے مطابق سوئی سدرن نے اینگرو ایل این جی ٹرمینل پر ایف ایس آر یو کی تبدیلی کی وجہ سے گیس کی لوڈ شیڈنگ کا پلان جاری ‏کر دیاہے۔

ایس ایس جی سی کے مطابق چار روز کے لئے سندھ اور بلوچستان کے سی این جی اسٹیشنز کو گیس کی فراہمی ‏بند کردی جائے گی جبکہ  کے الیکٹرک کو بھی گیس کی سپلائی کم دی جائے گی، کے الیکٹرک کو اس وقت 170 ‏ایم ایم سی ایف ڈی گیس فراہم کی جارہی ہے۔

ذرائع کے مطابق اگلے 4 روز تک 150 ایم ایم سی ایف ڈی گیس دی جائے گی صرف 20 ایم ایم سی ایف ڈی گیس کم کی جائے گی، ‏گیس کی کمی کو پورا کرنے میں دشواری ہوئی تو غیر برآمدی صنعتوں کو بھی گیس کی فراہمی بند کردی جائے ‏گی۔

واضح رہے کہ گیس کی قلت کی وجہ سے کراچی کے بعض علاقوں میں گیس کی بندش اور کم پریشر کی شکایات ‏بھی ہیں۔

کراچی میں بجلی کے بعد گیس لوڈشیڈنگ کا بحران بھی شدت اختیار کرگیا ہے۔

شہرقائد کے مختلف علاقوں میں گیس کا پریشر کم ہونے سے عوام پریشان ہیں۔

اس حوالے سے پریشان حال شہریوں کا کہناہےکہ صبح ہو یا شام گیس کا پریشر کم ہونے سے کھانا پکانا مشکل ہوگیاہے۔

شہر کے مختلف علاقوں کی تقریباً یہی صورتحال ہے۔ گیس آتی نہیں، اور اگر آبھی جائے تو پریشر نہیں ہوتا۔

اس صورتحال میں اکثر خواتین کو دن اور رات کے کھانے کیلئے صبح ہی تیاری کرنا ہوتی ہے۔

صرف یہی نہیں بلکہ شارٹ فال کے باعث نا صرف گھریلو بلکہ سی این جی اور صنعتی صارفین بھی مشکلات سے دوچار ہیں۔