معاون خصوصی برائے سی پیک امور خالد منصور نے کہا کہ سی پیک منصوبے کے فیزون میں 25 ارب ڈالر کی سرمایہ کاری  ہوچکی ہے۔

تفصیلات کے مطابق معاون خصوصی برائے سی پیک امور خالد منصور نے پریس کانفرنس کرتے ہوئے کہا کہ 13 ارب ڈالر کے منصوبے مکمل اور 12 ارب ڈالر کے منصوبے زیر تکمیل ہیں۔

انہوں نے کہا کہ فیز ٹو کے منصوبوں پر پیش رفت کا آغاز کردیا گیا ہے ، کچھ اقتصادی زونز میں کام بھی شروع ہوچکا ہے، علامہ اقبال اقتصادی زون میں چینی کمپنیاں سرمایہ کاری کررہی ہیں، فیصل آباد اقتصادی زون میں پری فیبریکیٹڈ گھر تعمیر کرنے کے کام کا آغاز کیا گیا ہے، پری فیبریکیٹڈ گھر صرف 40 روز میں بنے گا۔

معاون خصوصی برائے سی پیک امور خالد منصور نے کہا کہ چینی کمپنی نے اس ضمن میں 2 کروڑ ڈالر کی سرمایہ کاری کی ہے، دو اور تین پہیوں والی الیکٹرک وہیکل بنانے کے پلانٹ نے کام شروع کردیا ہے، ایل ای ڈی لائٹس کی 18 ایکڑ پر تین کروڑ ڈالر کی سرمایہ کاری کی گئی ہے، چینی سرمایہ کاروں کو جو مسائل تھے وہ حل کردیے ہیں۔

خالد منصور نے کہا کہ 845 ملین ڈالر کی سرمایہ ہوچکی ہے ، سی پیک رکنے کی باتیں درست نہیں ہیں ، سی پیک فیز ٹو میں داخل ہوچکا ہے ، حکومت ترجیحی بنیادوں پر سرمایہ کاروں کے مسائل حل کررہی ہے ، چینی کمپنیوں کے سی ای اوز وزیر اعظم کا شکریہ ادا کرنے آئے تھے۔

انہوں نے کہا کہ چینی سفارتخانے کے ساتھ بھرپور رابطے میں ہیں ، چار اسیپشل اکنامنک زونز میں سرمایہ کاری سے متعلق ون ونڈو سیل بنایا جارہا ہے ، فیز ٹو میں دو نہیں بہت زیادہ سیکٹرز ہونگے ، سی پیک منصوبوں کے خاطر خواہ انتظامات کیے گئے ہیں۔

معاون خصوصی برائے سی پیک امور خالد منصور نے کہا کہ سیکورٹی پر چینی حکومت کا اعتماد بحال ہوا ہے ، سی پیک کے تمام منصوبوں کی سیکورٹی بہترین ہے ، سی پیک عملے پر جو حملہ کیا گیا وہ دوران سفر ہوا سائٹ پر نہیں۔