محکمہ خوراک پنجاب نے 15 ستمبر سے گندم جاری کرنے کا فیصلہ کر لیا ہے۔

تفصیلات کے مطابق پنجاب حکومت ہر سال ماہ ستمبر میں فلور ملوں کو سستی گندم جاری کرتا ہے، رواں سال محکمہ خوراک پنجاب نے 45 لاکھ میٹرک ٹن گندم خریدی تھی۔

ذرائع کے مطابق گندم فوڈ سیکیورٹی کے لئے خریدی گئی ہے، فلور ملز مالکان نے سستی گندم سرکاری گوداموں سے ریلیز کرنے کا مطالبہ کر دیا ہے۔

اس کے علاوہ مارکیٹ میں گندم کی قیمت 2150 روپے سے 2200 روپے فی من ہے، مارکیٹ میں 20 کلو آٹے کی قیمت 1140 سے 1160 روپے ہے۔

خیال رہے کہ گزشتہ ایک ماہ کے دوران گندم کی قیمت میں 150 روپے فی من اضافہ ہوا اور فلور ملز مالکان نے 20 کلو آٹے کی قیمت میں 110 سے 130 روپے تک اضافہ کیا۔

مارکیٹ کے ذرائع کے مطابق نجی شعبے کے پاس 30 سے 35 لاکھ ٹن اور پنجاب حکومت کے پاس 45 لاکھ ٹن گندم موجود ہے، پنجاب میں گندم کی ماہانہ کھپت تقریباً 5 لاکھ ٹن سے قریب ہے۔

ذرائع کا کہنا ہے کہ پنجاب حکومت اگر ستمبر میں گندم جاری کرتی ہے تو اپریل تک 35 لاکھ ٹن گندم کی ضرورت ہوگی۔

واضح رہے کہ محکمہ خوراک پنجاب فلور ملوں کو روزانہ 17000 ٹن جاری کرتا رہا ہے، آٹے کی قلت پر روزانہ کوٹہ 17000 سے بڑھا کر 25000 کر دیا جاتا ہے، مارکیٹ میں آٹے کی قلت نہیں ہے، گندم اور آٹے کی وافر مقدار مارکیٹ میں موجود ہے۔