وفاقی وزیر اطلاعات فواد چوہدری کا کہنا ہے کہ آج وزیراعظم ایک بار پھر اقوام متحدہ کی توجہ ہندوستان میں ہونے والے مظالم کی طرف دلوائیں گے۔

‏تفصیلات کے مطابق وفاقی وزیر اطلاعات فواد چوہدری نے سماجی رابطے کی ویب سائٹ ٹوئٹر پر اپنے ایک پیغام میں کہا کہ کشمیر کے بعد آسام سے مسمانوں پر سیکیورٹی فورسز کے مظالم کی ویڈیوز سامنے آئی ہیں۔

کشمیر کے بعدآسام سے مسمانوں پر سیکیورٹی فورسز کے مظالم کی ویڈیوز سامنے آئیں ہیں،کل برطانوی ممبران پارلیمنٹ نے جس طرح کشمیر میں ڈھائےجانے والے مظالم پر گفتگو کی وہ قابل ستائش ہے آج وزیر اعظم ایک بارپھراقوام متحدہ کی توجہ ہندوستان میں ہونیوالے مظالم کی طرف دلوائیں گے. #ModiFascism

— Ch Fawad Hussain (@fawadchaudhry) September 24, 2021

فواد چوہدری نے اپنے ٹوئٹر پیغام میں مزید کہا ہے کہ برطانوی ممبران پارلیمنٹ نے جس طرح کشمیر میں ڈھائے جانے والے مظالم پر گفتگو کی وہ قابل ستائش ہے۔

اس سے قبل وفاقی وزیر اطلاعات فواد چوہدری نے سعودی عرب کے 91ویں قومی دن پر سیمینار سے خطاب کرتے ہوئے کہا تھا کہ سعودی عرب اور پاکستان کے تعلقات مذہبی اور تاریخی ہیں۔

انہوں نے کہا تھا کہ آل سعود کی سعودی عرب کیلئے قابل قدر خدمات ہیں ، سعودی عرب کے ساتھ پاکستان کا تعلق آزادی سے پہلے کا ہے ، وزیراعظم عمران خان اور شہزادہ محمد بن سلمان کے ذریعے دونوں ملکوں کے تعلقات نئے سرے سے استوار ہوئے۔

وفاقی وزیر اطلاعات فواد چوہدری نے مزید کہا تھا کہ پاکستان اور سعودی عرب کے درمیان دل کا رشتہ ہے ، پاکستانیوں کا دل مکہ اورمدینہ کےساتھ دھڑکتا ہے ، سعودی عرب نےہرمشکل وقت میں پاکستان کی مدد کی۔