مرکزی نائب صدر اور سابق اسپیکر قومی اسمبلی ایاز صادق کا کہنا ہے کہ عمران خان صاحب نے عوام پر پیٹرول اور بجلی کے بم گروا دیئے ہیں۔
تفصیلات کے مطابق مرکزی نائب صدر اور سابق اسپیکر قومی اسمبلی ایاز صادق نے سرگودھا میں میڈیا سے گفتگو کرتے ہوئے کہا کہ وزیراعظم کے احتساب کا وقت قریب ہے، بھاگنے نہیں دیں گے، عمران خان اور اس کے وزراء کو تلاشی دینا ہو گی۔
ایاز صادق نے کہا کہ عمران خان صاحب نے عوام پر پٹرول، بجلی اور گیس کے بم گروا دیئے ہیں، عمران خان کی مچانے والی تباہی کا بوجھ عوام نہیں اٹھا سکتی۔
سابق اسپیکر قومی اسمبلی نے کہا کہ نیازی حکومت نے نیب آرڈیننس میں این آر او کا دادا پیش کیا ہے، یہ اپنے لیے این آر او لے کر آئے ہیں جس میں اپنے وزراء کو محفوظ کیا جا رہا ہے، 20 سال سے ایک ہی گردان جاری ہے لیکن بی آر ٹی کی کرپشن پر چپ کیوں ہیں۔
انہوں نے کہا کہ ن لیگ دور میں 3 میٹرو بنیں ان پر آنے والی لاگت ایک میٹرو بی آر ٹی پر لگی، کیا وہ کرپشن نہیں؟ ملک میں چینی، آٹا اور گندم غائب ہے، یہ کیسی حکومت ہے۔
مرکزی نائب صدر کا کہنا ہے کہ خان صاحب کا فرمان ہے کہ ڈالر کی قیمت بڑھے ہے تو حکمران چور اب پچاس روپے بڑھا دیئے ہیں، اب کون چور ہے؟ پاکستان جس نہج پر ہے اللہ کرے ان سے جان چھوٹ جائے۔
انہوں نے کہا کہ حکیم سعید اور مولانا اسرار نے نام لیکر کہا تھا کہ عمران مغربی ایجنڈا لیکر آئے گا، پی پی اور اے این پی کے ساتھ قومی اسمبلی اور سینٹ میں ملکر چل رہے ہیں، تحریک انصاف کے 40 اراکین اسمبلی ن لیگ میں آنے پر تیار ہیں۔
ایاز صادق نے کہا کہ ن لیگ چھوڑ کر جانے والوں کی بڑی تعداد واپسی کیلئے پرتول رہی ہے، بی آر ٹی اور مالم جبہ میں بڑی کرپشن کی گئی، پنڈورا لیکس میں علیمہ باجی بھی ہیں، ان کے خلاف کب ایکشن لیں گے، پی پی اور اے این پی کا پی ڈی ایم میں واپسی کا فیصلہ مشاورت سے ہو گا۔
مرکزی نائب صدر اور سابق اسپیکر قومی اسمبلی ایاز صادق نے مزید کہا کہ سپریم کورٹ کب پنڈورا لیکس پر جے آئی ٹی اور نگران جج مقرر کررہی ہے؟ پانامہ لیکس میں صرف میاں نواز شریف کو نشانہ بنایا گیا، عمران خان اور ان کے وزراء پنڈورا لیکس کے معاملے پر فوری استعفیٰ دیں، مجھے یہ حکومت اگلے الیکشن تک رہتی نظر نہیں آتی۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News