افغانستان میں امن کیلئے پاکستان کا کردار روس سے کم نہیں، پیوٹن

وریشہ مسعودویب ایڈیٹر

22nd Oct, 2021. 06:29 pm

روسی صدر ولادیمیر پیوٹن نے کہا ہے کہ افغانستان میں امن کے لئے پاکستان کا کردار روس سے کم نہیں۔

تفصیلات کے مطابق روسی صدر ولادیمیر پیوٹن نے بین الاقوامی والڈائی ڈسکشن کلب کے اجلاس سے خطاب کرتے ہوئے کہا کہ ماسکو افغانستان کی کبھی نہ ختم ہونے والی خانہ جنگی کا خاتمہ دیکھنے میں دلچسپی رکھتا ہے۔

ولادیمیر پیوٹن نے کہا کہ یہ بات کسی شک و شبہ سے بالاتر ہے کہ روس افغانستان کو خانہ جنگی کے نہ ختم ہونے والے سلسلے اور اسے مصیبت زدہ ملک کے لوگوں سے ابھرتا ہوا دیکھنے میں دلچسپی رکھتا ہے۔

روسی صدر نے کہا کہ روس چاہتا ہے کہ افغانستان میں ٹھوس بنیادوں پر قیام امن ہو اور اس کے نتائج سے افغان قوم مستفید ہوسکے۔

اجلاس کے دوران ولادیمیر پیوٹن نے زور دیا کہ اس صورتحال میں پاکستان کا کردار کسی بھی طرح روس یا چین کے کردار سے چھوٹا نہیں ہے۔

روسی صدر ولادیمیر پیوٹن کا مزید کہنا تھا کہ افغانستان میں امن کے لئے پاکستان کا کردار روس سے کم نہیں، ہم اس مشترکہ مقصد کے حصول کی خاطر تعاون بڑھانے میں دلچسپی رکھتے ہیں۔

واضح رہے اس سے قبل والڈائی انٹرنیشنل ڈسکشن کلب کے 18 ویں سالانہ سیشن میں شرکاء سے ملاقات کے بعد روس کے وزیر خارجہ سرگئی لاوروف نے میڈیا سے گفتگو کرتے ہوئے کہا تھا کہ طالبان کی سرکاری شناخت پر بات نہیں کی جا رہی ہے اور یہ عوامی طور پر بیان کیا گیا ہے۔

سرگئی لاوروف نے کہا تھا کہ دوسرے ممالک جو اس خطے میں اثر و رسوخ رکھتے ہیں، ان کی طرح روس بھی طالبان سے رابطے برقرار رکھتا ہے اور امید کرتا ہے کہ طالبان اپنے وعدوں کو پورا کریں گے ۔

روس کے وزیر خارجہ سرگئی لاوروف نے مزید کہا تھا کہ افغان حکومت کی شمولیت کو یقینی بنانے کے لیے اقدامات کریں گے نہ صرف نسلی بلکہ سیاسی نقطہ نظر سمیت افغانستان کے تمام گروہوں کو شمولیت کی دعوت دیں گے۔

Square Adsence 300X250