صدر مملکت ڈاکٹر عارف علوی نے کہا ہے کہ ملکی ترقی کیلئے اعلیٰ تعلیمی ادارے تحقیق و ترقی پر توجہ دیں۔

تفصیلات کے مطابق اسلام آباد میں صدر مملکت ڈاکٹر عارف علوی کو سر سید کیس انسٹیٹیوٹ آف ٹیکنالوجی پر بریفنگ دی گئی، کیس کے وائس چانسلر پروفیسر ڈاکٹر شفاعت احمد بزاز نے صدر مملکت کو انجینئرنگ اور ٹیکنالوجی کے شعبے میں جدید تعلیم کے فروغ میں ادارے کے کردار سے آگاہ کیا۔

 صدر مملکت ڈاکٹر عارف علوی کو بریفنگ دی گئی کہ کیس انجینئرنگ مینجمنٹ، بزنس اور کمپیوٹنگ کے شعبوں میں بیچلر سے لے کر پی ایچ ڈی تک مختلف شعبوں میں تعلیم دے رہا ہے، اس وقت 900 سے زائد طلبہ انسٹیٹیوٹ میں مختلف شعبوں میں زیرِ تعلیم ہیں۔

بریفنگ میں کہا گیا کہ ادارے کے قیام سے اب تک 3500 سے زائد طلباء فارغ التحصیل ہو چکے ہیں، یونیورسٹی نے 2017 سے اب تک مستحق طلباء کو 54 ملین روپے کے وظائف اور مالی امداد دی ہے۔

صدر مملکت ڈاکٹر عارف علوی کا کہنا تھا کہ صنعتی شعبے کی ضروریات پوری کرنے اور نوجوانوں کو روزگار کی فراہمی کیلئے تکنیکی اور آئی ٹی تعلیم کے فروغ کی ضرورت ہے، ملک کی تکنیکی اور صنعتی ترقی یونیورسٹی سطح پر تعلیم کے معیار سے براہ راست جڑی ہے۔

ڈاکٹر عارف علوی نے کہا کہ ملکی ترقی کیلئے اعلیٰ تعلیمی ادارے تحقیق و ترقی پر توجہ دیں، جامعات کو اپنے طلباء میں تجزیاتی اور منطقی سوچ کے فروغ پر توجہ دینی چاہیے۔

صدر مملکت ڈاکٹر عارف علوی کا مزید کہنا تھا کہ سر سید احمد خان کی تعلیمات مستقبل میں نوجوانوں کو رہنمائی فراہم کر سکتی ہیں، ادارے کی انتظامیہ طلباء کی تعداد کے ساتھ ادارے کی ورچوئل صلاحیت بھی بڑھائے، پبلک اور پرائیویٹ سیکٹر کی جامعات کے ساتھ روابط بڑھانے کی ضرورت ہے۔