وفاقی وزیر برائے مذہبی امور پیر نور الحق قادری نے کہا ہے کہ کالعدم تحریک لبیک کے ساتھ جو بھی معاہدے ہوئے اسکا وزیر اعظم عمران خان کو علم تھا۔

تفصیلات کے مطابق وفاقی وزیر برائے مذہبی امور پیر نور الحق قادری نے کہا کہ میری کیا مجال کہ وزیر اعظم کو بتائے بغیر کوئی معاہدہ کروں۔

وفاقی وزیر برائے مذہبی امور پیر نور الحق قادری نے کہا کہ جو وزراء یہ کہ رہے ہیں کے وزیراعظم کو معاہدوں کا علم نہیں تھا وہ جھوٹ بول رہے ہیں۔

واضح رہے کہ وزیراعظم سے علمائے کرام کے وفد نے ملاقات کی تھی جس میں علماء نے عمران خان سے سعد رضوی کو رہا کرنے کا مطالبہ کیا جس پر وزیراعظم نے کہا تھا کہ اگر عدالتیں سعد رضوی کو رہا کرتی ہیں تو ہمیں کوئی اعتراض نہیں ہوگا۔

ذرائع کا کہنا تھا کہ حکومت نے سعد رضوی کی رہائی کا فیصلہ عدلیہ پر چھوڑ دیا ہے۔

عمران خان نے کہا تھا کہ فرانس کے سفیر کو نکالنا مسئلے کا حل نہیں ، دنیا کو توہین رسالت سے متعلق سمجھانا ہوگا ، ماضی میں کسی وزیراعظم کو اس موضوع پر بات کرنے کی توفیق نہیں ہوئی ، دنیا کو بتانا ہوگا کہ یہ کرنے سے اربوں مسلمانوں کے دل دکھتے ہیں۔

انہوں  نے کہا تھا کہ عشق رسولﷺ صرف تحریک لبیک نہیں سارے مسلمانوں میں موجود ہے ، حکومت لانگ مارچ پر تشدد نہیں کرنا چاہتی ، فائرنگ مظاہرین کی جانب سے کی گئی ، پولیس نے تشدد کا راستہ نہیں اپنایا۔

ذرائع کا کہنا تھا کہ علماء نے فواد چوہدری کے بیانات پر اعتراضات کیے اور ان کے بیانات کا حوالہ بھی دیا۔