شیری رحمان نے کہا کہ پیٹرول کی قیمتوں میں اضافے کو مسترد کرتے ہیں۔

پاکستان پیپلزپارٹی کی مرکزی نائب صدر و سینیٹر شیری رحمان نے پیٹرول کی قیمتوں میں ہوشربا اضافے پر تشویش کا اظہار کرتے ہوئے کہا کہ پاکستان پیپلزپارٹی نے پیٹرول کی قیمتوں میں اضافے کو مسترد کر دیا۔

انہوں نےکہا کہ تباہی سرکار نے پیٹرول کی قیمت میں مزید 8 روپے 3 پیسے فی لیٹر اضافہ کر دیا، دو ہفتے پہلے پیٹرول کی قیمت میں 10 روپے اضافہ کیا گیا تھا، پیٹرول کی نئی قیمت اب 145 روپے 82 پیسے ہوگئی ہے۔

شیری رحمان کا کہنا تھا کہ وزیراعظم پیٹرول کی قیمتیں بڑھا کر کہتے ہیں عوام کو ریلیف دے رہے ہیں، وزیراعظم ریلیف دے نہیں، مانگ رہے تھے۔

پاکستان پیپلزپارٹی کی مرکزی نائب صدر نے مزید کہاکہ  پیٹرول کی قیمتوں میں اضافے سے ہر چیز مہنگی ہو گی، پہلے ہی مہنگائی کی شرح 14.31 فیصد ہو چکی ہے، حکومت عوام پر رحم کرے اور تیل کی قیمتیں واپس لے۔

دوسری جانب ترجمان مسلم لیگ (ن) مریم اورنگزیب نے پیٹرول کی قیمتوں میں اضافے پر ردِ عمل دیتے ہوئے کہا کہ عمران صاحب آپ کا تکلیف پیکج عوام کو بہت مہنگا پڑ رہا ہے۔

ان کا کہنا تھا کہ عمران صاحب اور عمران صاحب کا ہر اعلان صرف جھوٹ، فراڈ اور دھوکہ ہوتا ہے۔

ترجمان مسلم لیگ ن نے کہاکہ عمران صاحب کیا آپ کو عوام سے جھوٹ بول کر شرم بھی نہیں آتی، عمران صاحب اللہ کا واسطہ ہے عوام پہ ترس کھائیں۔

مریم اورنگزیب نے کہا کہ ریلیف پیکج کے بعد چینی 150 روپیہ کلو اور پیٹرول 146روپیہ عوام کی تضحیک ہے ، عوام جانتی ہے کہ آپ کا ریلیف پیکج اپنے اے ٹی ایمز ، مافیا اور کارٹلز کے لیے ریکیف اور عوام کیلئے صرف تکلیف ہے۔

انہوں نے کہا کہ آپ عوام کو کوئی ریلیف نہیں دے سکتے ، اللہ کا واسطہ ہے عوام کو اپنا استعفیٰ دے دیں۔

ان کا مزید کہنا تھا کہ پیٹرول کی قیمت بڑھنے سے ایک بار پھر آٹا ، چینی ، گیس ، بجلی ، دوائی اور کھانے پینے کی اشیا کی قیمت میں اضافہ ہوگا۔

‎ مریم اورنگزیب کا کہنا تھا کہ تکلیف پیکج کے تحت پیٹرول چینی کی قیمت بڑھانا عوام کی مشکلات میں اضافہ اور مافیا کی زندگیوں میں آسانیاں لانے اور جیبیں بھرنے کیلئے سنگِ میل ثابت ہورہا ہے۔

انہوں نے یہ بھی کہا کہ عمران صاحب مہنگائی سے پسی عوام کی چیخوں اور بددعاؤں کی آوازیں سُنیں اور استعفیٰ دیں۔

واضح رہے کہ وفاقی حکومت کی جانب سے رات گئے پیٹرولیم مصنوعات کی قیمتوں میں بڑا اضافہ کیا گیا ہے۔

اس حوالے سے جاری کردہ نوٹی فکیشن کے مطابق پیٹرول کی قیمت میں 8 روپے 3 پیسے فی لیٹر اضافہ کیا گیا ہے جس کے بعد اس کی نئی قیمت 145 روپے 82 پیسے فی لیٹر ہو گئی ہے۔