مشیر خزانہ شوکت ترین نے کہا ہے کہ سنگل ونڈو سے بہتر شفافیت اور تجارتی مسابقت کو فروغ ملے گا۔

شوکت ترین کی زیر صدارت پاکستان سنگل ونڈو گورننگ کونسل کا دوسرا اجلاس ہوا جس میں سیکرٹری کونسل نے سنگل ونڈو پر ہونے والی پیش رفت، کامیابیوں اور اہداف بارے بریفنگ دی۔

بریفنگ دیتے ہوئے کہا گیا کہ آپریشنل، گورننس، ریونیو اور فنکشنل ماڈلز ڈیزائن کئے گئے جبکہ پاکستان کسٹمز نے مقامی و عالمی ماہرین کے ساتھ مل کر سنگل ونڈو کو ڈیزائن اور نافذ کیا   ہے۔

اجلاس میں بریفنگ دیتے ہوئے مزید  کہا گیا کہ پاکستان سنگل ونڈو کا پہلا مرحلہ جاری ہے اور مارچ 2022 میں مکمل ہوگا، اس سے پاکستان ڈبلیو ٹی او کے تجارتی معاہدے کے تحت اپنے وعدوں کے بارے میں مطلع کر سکے گا۔

اجلاس کی صدارت کرتے ہوئے مشیر خزانہ شوکت ترین نے سرکاری اور نجی شعبے میں تعاون پر زور دیا۔

شوکت ترین نے پاکستان سنگل ونڈو کے حوالےسے پیش رفت پر اطمینان کا اظہار کیا جبکہ مشیر خزانہ نے ایف بی آر اور پاکستان کسٹمز کے کردار کو  بھی سراہا

اس موقع پر مشیر خزانہ شوکت ترین  کا کہنا تھا کہ پاکستان سنگل ونڈو موجودہ حکومت کا ایک اہم قدم ہے، سنگل ونڈو سے بہتر شفافیت اور تجارتی مسابقت کو فروغ ملے گا ۔

وفاقی وزیر شبلی فراز، سیکرٹری تجارت،گورنر اسٹیٹ بینک اور ایف بی آر حکام نے  شرکت کی۔