اسٹیٹ بینک اور ایف آئی اے نے منی لانڈرنگ، سائبر حملوں کے خلاف مؤثر تعاون کا عزم کیا ہے۔

اسٹیٹ بینک آف پاکستان اور وفاقی تحقیاتی ادارے نے فیصلہ کیا ہے کہ منی لانڈرنگ، ڈیجیٹل فراڈ اور سائبر حملوں کے خلاف تعاون کو مزید مضبوط کیا جائے گا۔

اسٹیٹ بینک کے گورنر رضا باقر کی زیرِ قیادت ایک اہم اجلاس ہوا جس میں گورنر نے بینکوں، اسٹیٹ بینک اور ایف آئی اے کے درمیان قریبی تعاون کی ضرورت پر زور دیا۔

رضا باقر کا کہنا تھا کہ قریبی تعاون بہت ضروری ہے تاکہ وہائٹ کالر کرائمز کی تیزی سے تحقیقات اور جعلسازوں کو پکڑ کر ان کے خلاف قانونی کارروائی کی جاسکے۔

دوسری جانب اسٹیٹ بینک کے گورنر رضا باقر نے ملک میں مہنگائی بڑھنے کا اعتراف کرلیا ہے، ان کا کہنا تھا کہ مہنگائی میں کمی کیلئے اقدامات کئے جا رہے ہیں ملکی اقتصادی شرح نمو میں بھی اضافہ ہو رہا ہے رواں سال اقتصادی شرح نمو 5 فیصد تک رہنے کی توقع ہے۔

ان کا کہنا تھا کہ پروڈکشن کی صلاحیت زیادہ ہوتی تو درآمدات کا عام آدمی پر ذیادہ اثر نہ پڑتا، مارک اپ میں اضافہ درآمدات میں کمی کا ایک طریقہ ہے۔

واضح رہے کہ گورنر اسٹیٹ بینک رضا باقر نے مانچسٹر میں پریس کانفرنس اور کمیونٹی ڈنر سے خطاب کرتے ہوئے کہا تھا کہ دنیا کے ہر ملک میں مہنگائی ہوئی ہے، امریکا میں جتنی اب مہنگائی ہوئی ہے گزشتہ 20 سے 30 سال میں اتنی نہیں ہوئی۔

ان کا کہنا تھا کہ روپے کی قدر گرنے سے اوورسیز پاکسانیوں کو فائدہ ہوا، ایف اے ٹی ایف کی 27 میں سے 26 شرائط پر عمل در آمد ہو گیا۔