مسلم لیگ(ن) پنجاب کی ترجمان عظمیٰ بخاری نے کہا ہے کہ تحریک انصاف کو بلدیاتی الیکشن کے لئے امیدوار نہیں مل رہے۔

انہوں نے حکومتی وزراء کی پریس کانفرنس پر ردعمل دیتے ہوئے کہا کہ بزدار حکومت دو سال سے ہمارا لوکل گورنمنٹ بل کا واویلا کررہی ہے۔

عظمیٰ بخاری نے کہا کہ پنجاب کے 35وزراء اور 10ترجمان اپنی اپنی ترامیم لاچکے ہیں جبکہ گورنر پنجاب اور اسپیکر پنجاب اسمبلی اپنی الگ سے ترامیم شامل کرچکے ہیں۔

مسلم لیگ(ن) کی ترجمان کا کہنا ہے کہ بدقسمتی ہے صوبے کے چیف ایگزیکٹیو اپنی ترمیم ہر کابینہ اجلاس میں لے کر جاتے ہیں لیکن انکو کوئی نہیں پوچھتا، 2 سال میں پنجاب حکومت اپنے ہی لوکل گورنمنٹ بل میں 37ترامیم کرچکی ہے۔

انکا کہنا ہے کہ الیکشن کمیشن تاحال پنجاب حکومت کے جعلی بلدیاتی نظام سے اتفاق نہیں کررہا، پنجاب کے 58ہزار بلدیاتی نمائندوں کے حق پر ڈاکہ مارنے والے آج کس منہ سے جمہوریت کے چمپیئن بن رہے ہیں۔

عظمیٰ بخاری نے کہا کہ تحریک انصاف کو بلدیاتی الیکشن کےلئے امیدوار نہیں مل رہے، پنجاب میں کوئی بھی شخص پی ٹی آئی کے ٹکٹ کی بجائے آزاد الیکشن لڑنے کو ترجیح دے رہے ہیں۔

انہوں نے کہا کہ سندھ میں تحریک انصاف نے بلدیاتی ایکٹ پر اودھم مچا رہا ہے لیکن پنجاب کی خبر نہیں ہے، جس دن پنجاب کے بلدیاتی الیکشن کی تاریخ کا اعلان ہوگا اس دن عمران خان اور پی ٹی آئی کو اپنی عوامی دشمن حکومت کا اندازہ ہو جائے گا۔

عظمیٰ بخاری نے مزید کہا کہ کنوٹنمنٹ بورڈ اور ضمنی انتخابات کی طرح بلدیاتی الیکشن میں بھی تحریک انصاف کو تاریخی مار پڑے گی، عمران خان دھاندلی کے جتنے حربے استعمال کرسکتے تھے کرچکے اب صرف ”شیر“ کا نشان ہی جیت کا نشان ہوگا۔