وفاقی وزیر برائے اطلاعات چوہدری فواد حسین نے حکومت پاکستان اور عوام کی طرف سے قازقستان کی قیادت اور عوام کو قومی دن کے موقع پر مبارکباد پیش کی۔

وزیراطلاعات نے کہا کہ پاکستان اور قازقستان کے درمیان تاریخی، مشترکہ مذہبی و ثقافتی اقدار پر مبنی 30 سالوں سے مضبوط سفارتی تعلقات قائم ہیں، دونوں ممالک کے عوام کا ایک دوسرے سے محبت اور احترام کا رشتہ ہے۔

فواد چوہدری نے اپیل کی کہ قازقستان سمیت عالمی برادری انسانی ہمدردی کی بنیادوں پر افغان عوام مدد کے لئے آگے آئے۔

ان کا مزید کہنا تھا کہ پاکستان اور قازقستان کو خطے بالخصوص دنیا کے امن و استحکام کے لئے مختلف فورمز پر مل کر کام کرنے کی ضرورت ہے۔

وزیراطلاعات فواد چوہدری نے کہا کہ پاکستان اپنی وژن سینٹرل ایشیاء پالیسی کے تحت وسطی ایشیائی ممالک کے ساتھ جامع روابط کو فروغ دینے کا عزم رکھتا ہے۔

ان کا مزید کہنا تھا کہ قازقستان وسطی ایشیاء کا ایک اہم ملک ہے، دونوں ملکوں کی معیشتوں کی بنیاد زراعت اور صنعتوں پر ہے، لہٰذا دونوں ممالک کو ان شعبوں میں تعاون کو فروغ دینا چاہئے۔

فواد چوہدری کہتے ہیں کہ سیاسی، تجارتی، سرمایہ کاری، توانائی، باہمی روابط، سکیورٹی اور ثقافت کے شعبوں میں دونوں ممالک کو مل کر کام کرنے کی ضرورت ہے۔ پاکستان اور قازقستان اقوام متحدہ سمیت اسلامی تعاون تنظیم، شنگھائی تعاون تنظیم اور اقتصادی تعاون تنظیم کے رکن ممالک ہیں۔ مضبوط سفارتی، تاریخی، مذہبی اور سیاسی روابط کے حامل تعلقات کے باعث دونوں ممالک اہم تجارتی شراکت دار بننے کی بھرپور صلاحیت رکھتے ہیں۔

ان کا مزید کہنا تھا کہ پاکستان اور قازقستان کو سلک روٹ اور اپنی جغرافیائی اہمیت کی وجہ سے پوری دنیا میں اہم مقام حاصل ہے۔

انہوں نے کہا کہ اسلام آباد کو دنیا میں منفرد مقام حاصل ہے، دنیا کی 65 فیصد آبادی اسلام آباد سے تین گھنٹے کی مسافت پر ہے، ہم وسطی ایشیائی ریاستوں کے ساتھ ریلوے اور روڈ نیٹ ورک کو توسیع دینا چاہتا ہیں۔

تقریب سے خطاب میں ان کا کہنا تھا کہ دونوں ممالک کو اپنے نجی شعبوں میں تعاون کو فروغ دینے کی ضرورت ہے۔ پاکستان میں توانائی، زراعت، انفارمیشن ٹیکنالوجی، مواصلات، تعمیرات اور ریلوے کے شعبہ میں تجارت کے وسیع مواقع موجود ہیں۔