وزیر اعلیٰ پنجاب سردار عثمان بزدار نے کہا ہے کہ ہمارا ایجنڈا صرف عوام کی خدمت ہے۔
سردار عثمان بزدار سے صوبائی وزیر قانون راجہ بشارت اور صوبائی وزیر پبلک پراسیکیوشن چوہدری ظہیر الدین کی ملاقات ہوئی جس میں صوبائی وزراء نے وزیر اعلیٰ عثمان بزدار کو اپنے محکموں کی کارکردگی سے آگاہ کیا۔
ملاقات میں صوبائی وزراء نے محکموں میں اصلاحات کے جاری پروگرامز پر ہونے والی پیش رفت کے بارے میں بریفنگ دی۔
عثمان بزدار کا کہنا تھا کہ ہمارا ایجنڈا صرف عوام کی خدمت ہے، محکموں میں اصلاحات کرکے عوام کیلئے آسانیاں پیدا کی ہیں، پنجاب کے بے مثال ترقیاتی پروگرام کے تحت ہر ضلع میں ترقی کے ثمرات پہنچ رہے ہیں۔
انہوں نے کہا کہ ترقیاتی فنڈز کی غیر منصفانہ تقسیم کے سابقہ کلچر کو ختم کیا ہے، سابق دور میں ترقیاتی فنڈز کو ذاتی پسند و ناپسند کے تحت خرچ کیا گیا، نئے پاکستان میں پائی پائی امانت سمجھ کر دیانت کے ساتھ عوام پر خر چ کررہے ہیں۔
وزیر اعلیٰ پنجاب کا کہنا تھا کہ مخالفین ترقی کا سفر روکنا چاہتے ہیں، تنقید برائے تنقید کرنے والے عناصر ہر موقع پر ناکام رہے ہیں، اپوزیشن کے پاؤں اکھڑ چکے ہیں، ہماری سمت درست اور نیت نیک ہے۔
وزیر اعلیٰ پنجاب سردار عثمان بزدار نے مزید کہا کہ عوام کے مسائل کے حل کے لئے دن رات ایک کئے ہوئے ہیں، قوم کو وزیر اعظم عمران خان کی قیادت پر غیر متزلزل یقین اور مکمل اعتماد ہے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News