پی ڈی ایم کے ترجمان حافظ حمداللہ نے کہا ہے کہ اسکروٹنی کمیٹی کی رپورٹ سے عمران خان اور پی ٹی آئی کی چوری پکڑی گئی ہے۔

پاکستان ڈیموکریٹک موومنٹ (پی ڈی ایم) کے ترجمان حافظ حمداللہ نے اسکروٹنی کمیٹی کی فارن فنڈنگ کیس میں رپورٹ پر ردعمل دیتے ہوئے کہا کہ اسکروٹنی کمیٹی کی رپورٹ سے عمران خان اور پی ٹی آئی کی چوری پکڑی گئی۔

حافظ حمداللہ نے کہا کہ اسکروٹنی کمیٹی نے پی ٹی آئی کی اصلیت قوم پر عیاں کردی، دوسروں پر چوری کے الزامات لگانے والے عمران خان خود چور نکلے۔

انہوں نے کہا کہ عمران خان قوم کو بتائیں 53 بینک اکاؤنٹس کیوں چھپائے تھے؟ خفیہ بنک اکاؤنٹس کن مقاصد کے لئے استعمال ہوتے رہے؟

ترجمان پی ڈی ایم نے کہا کہ رپورٹ سے ثابت ہوا کہ عمران خان صادق اور امین نہیں رہے ،رپورٹ سے یہ بھی ثابت ہوا کہ عمران خان سمیت پی ٹی آئی ممنوعہ غیر ملکی فنڈنگ میں ملوث ہے۔

حافظ حمداللہ نے مزید کہا کہ عمران نیازی سمیت پی ٹی آئی کو سیاست کے لئے تاحیات نااہل قرار دینا ضروری ہے۔

یاد رہے پاکستان تحریک انصاف کے خلاف اسکروٹنی کمیٹی کی رپورٹ کے اہم نکات سامنے آئے جس کے مطابق  اسٹیٹ بینک کی جانب سے پی ٹی آئی کے بینک اکاؤنٹس کی تفصیلات رپورٹ کا حصہ ہیں جبکہ پاکستان میں ڈالرآپریٹڈ اکاؤنٹس کی تفصیلات بھی رپورٹ میں شامل ہے۔

اسکروٹنی کمیٹی کی رپورٹ میں ممنوعہ فنڈنگ سے متعلق بھارتی، فرانسیسی اور آسٹریلوی قوانین کا حوالہ بھی شامل ہے۔

تحریک انصاف کے 2008 سے 2013 کے آڈٹ کی تفصیلات اور اسکروٹنی کمیٹی نے بینک اکائونٹس پراپنا تجزیہ بھی رپورٹ کا حصہ بنایا ہے۔

پی ٹی آئی اسکروٹنی کمیٹی رپورٹ کے نکات میں بتایا گیا کہ سال 2012-13 کی آڈٹ رپورٹ پر کوئی تاریخ درج نہیں ہے۔ آڈٹ فرم کی فراہم کردہ کیش رسیدیں بنک اکاؤنٹس سے مطابقت نہیں رکھتیں۔

آڈٹ رپورٹ منظوری کیلئے پی ٹی آئی سنٹرل ایگزیکٹو کمیٹی میں پیش کی گئی تھی۔ آڈٹ رپورٹ پر تاریخ نہ ہونا اکاؤنٹنگ معیار کے خلاف ہے۔