پی ٹی آئی کے رہنما فرخ حبیب نے کہا ہے کہ الیکشن کمیشن کوبلاتفریق تمام جماعتوں کی جانچ پڑتال کرنی چاہیے۔
میڈیا سے بات کرتے ہوئے پاکستان تحریک انصاف کے رہنما نے بتایا کہ پارٹی کی جانب سے ممنوعہ فنڈنگ کیس میں انٹرا کورٹ اپیل دائر کرنے کا فیصلہ کیا گیا ہے۔
فرخ حبیب کا کہنا تھا کہ اسلام آباد ہائیکورٹ کے فیصلے کیخلاف انٹراکورٹ اپیل دائر کرینگے۔
انہوں نے کہا کہ پیپلزپارٹی، ن لیگ کے کیسز کو کیوں ایک ایک ماہ کیلئے ملتوی کیا گیا؟ اور کیوں پیپلزپارٹی اورن لیگ کاکیس آگے نہیں بڑھ رہا؟
انہوں نے مطالبہ کیا ہے کہ پی ٹی آئی کے ساتھ ساتھ ن لیگ، پیپلزپارٹی کے کیس کی بھی روزانہ سماعت کی جائے۔
اس موقع پر انہوں نے بتایا کہ ن لیگ اور پیپلزپارٹی کے خفیہ اکاؤنٹس ہیں جبکہ ہمارے پاس تمام ڈونرز کا ریکارڈ موجود ہے۔
فرخ حبیب نے بتایا کہ ن لیگ پارٹی اکاؤنٹس کو پیسہ وائٹ کرنے کیلئے استعمال کرتی رہی ہے جبکہ پیپلزپارٹی نے 12 اکاؤنٹس چھپائےہیں۔
خیال رہے کہ الیکشن کمیشن آف پاکستان نے فارن فنڈنگ کیس کی سماعت روزانہ کی بنیاد پر کرنے کا فیصلہ کیا ہے۔
فارن فنڈنگ کیس کا پس منظر
تحریک انصاف کے بانی رکن اکبر ایس بابر نے 2014 میں الیکشن کمیشن میں درخواست دائر کی تھی، جس میں موقف اختیار کیا گیا تھا کہ تحریک انصاف نے 2007 سے 2012 کے دوران بیرونِ ملک سے ملنے والے عطیات کی تفصیلات الیکشن کمیشن سے چھپائیں۔
2015 میں الیکشن کمیشن نے حکم جاری کیا کہ تحریک انصاف نے ملنے والے فنڈز سے متعلق تمام تفصیلات نہیں بتائیں۔ 3 سال تک مختلف عدالتوں میں درخواتوں کی سماعت کے بعد الیکشن کمیشن نے 2018 میں پارٹی فنڈز کی جانچ پڑتال کے لئے اسکروٹنی کمیٹی تشکیل دی۔
الیکشن کمیشن آف پاکستان کی اسکروٹنی کمیٹی کی رپورٹ میں کہا گیا ہے کہ پاکستان تحریک انصاف نے غیر ملکی شہریوں اور کمپنیوں سے فنڈز حاصل کیے لیکن ان فنڈز کو کم دکھایا اور درجنوں بینک اکاؤنٹس چھپائے۔ رپورٹ میں کہا گیا ہے کہ تحریک انصاف نے 2009 سے 2013 کے درمیان عطیات کی مد میں حاصل کئے گئے 31 کروڑ 20 لاکھ روپے سے زائد رقم کو چھپایا۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News