پاکستان تحریک انصاف کے اراکین کی جانب سے قومی اسمبلی کی نشستوں سے دیئے جانے والے استعفوں کی تصدیق کا آغاز ایک بار پھر کردیا گیا ہے۔
اس حوالے سے اسمبلی ذرائع کا کہنا ہے کہ اسپیکر راجہ پرویز اشرف کے حکم پر استعفوں کی دوبارہ تصدیق شروع کی گئی ہے۔
ذرائع کے مطابق پہلے مرحلے میں تحریک انصاف کے اراکین کے استعفوں پر ان کے دستخطوں کی تصدیق کی جارہی ہے جس میں بعض اراکین کے استعفوں پر دستخط اور رول آف سائن پر دستخط مختلف نکلے ہیں۔
ذرائع نے بتایا ہے کہ اب تک چھ اراکین کے دستخط ان کے اصل دستخط سے مختلف ہیں اور ایسے اراکین کو بلا کر دستخطوں کی تصدیق کی جائیگی۔
دوسرے مرحلے میں ہر رکن کو اسپیکر کے سامنے پیش ہو کر اپنے استعفے کی تصدیق کرنی ہوگی ۔
خیال رہے کہ ذاتی طور پر تصدیق کے لیے بلانے کا عمل عید کے بعد شروع ہوگا جس دوران سابق وزیراعظم عمران خان کو بھی طلبی کا نوٹس بھی جاری کیا جائیگا۔
ذرائع نے بتایا کہ جو رکن اسپیکر کے سامنے پیش کر رضاکارانہ طور پر استعفے کی تصدیق نہیں کرے گا اس کا استعفیٰ قبول نہیں کیا جائیگا۔
یاد رہے کہ نومنتخب اسپیکر راجہ پرویز اشرف نے پی ٹی آئی کے استعفوں کی منظوری کو کالعدم قرار دے دیا تھا۔
راجہ پرویز اشرف نے قومی اسمبلی کے اجلاس کے دوران پاکستان تحریک انصاف کے استعفوں پر دوبارہ کارروائی کی رولنگ دی تھی۔
انہوں نے کہا تھا کہ پی ٹی آئی کے ارکان میرے سامنے قومی اسمبلی سیکرٹریٹ میں دوبارہ اپنے استعفے پیش کریں جن پر قانون کے مطابق کارروائی کی جائیگی۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News