سابق وزیر خارجہ شاہ محمود قریشی نے کہا ہے کہ حکومت ہوش کے ناخن لیں، قانونی اور آئینی فیصلے کریں۔
پاکستان تحریک انصاف کے وائس چیئرمین مخدوم شاہ محمود قریشی نے سیالکوٹ میں پی ٹی آئی کارکنان پر لاٹھی چارج اور ان کی بلاجواز گرفتاریوں کے حوالے سے اپنے بیان میں کہا ہے کہ پرامن احتجاج کے آئینی حق سے ہرگز پیچھے نہیں ہٹیں گے۔
شاہ محمود قریشی نے کہا کہ پنجاب میں ہمارا پہلا جلسہ منعقد نہیں ہو رہا، م نے اٹک، جہلم، میانوالی میں پر امن جلسے منعقد کیے، خیبر پختون خواہ اور سندھ میں بھی ہمارے جلسے دیکھے ہیں۔
انہوں نے کہا کہ ہم نے پرامن رہتے ہوئے اور قانون اور ضابطے کی پاسداری کرتے ہوئے تمام جلسے منعقد کیے ہیں اور آج ہونے والے جلسے سے متعلق بھی رات تک سب ٹھیک چل رہا تھا لیکن انتظامیہ کی جانب سے یکدم رویہ تبدیل ہوگیا۔
انہوں نے بتایا کہ ماحول کو خراب کرنے کی کوشش کی جارہی ہے ، جو آگ کو بھڑکانے کی کوشش کی جا رہی ہے وہ صرف سیالکوٹ تک محدود نہیں رہے گی بلکہ پورے پنجاب کو اپنی لپیٹ میں لے لے گی۔
ان کا کہنا تھا کہ عمران خان آج سیالکوٹ تشریف لائیں گے اور خطاب کریں گے،بہتر یہی ہے کہ ہمارے راستے میں رکاوٹیں پیدا نہ کی جائیں۔
شاہ محمود قریشی نے کہا ہے کہ آج ہمارے کارکنان جلسے میں شرکت کیلئے نکلیں گے اور جلسہ بھی شیڈول کے مطابق منعقد ہو گا اور اگر رخنہ اندازی کی کوشش کی گئی اور پر امن کارکنان پر کسی قسم کا تشدد کیا گیا تو اس کے ذمہ دار حمزہ شہباز، پنجاب حکومت اور ضلعی انتظامیہ ہو گی۔
انہوں نے کہا کہ حقیقی آزادی کے حصول کی جدوجہد کیلئے، ہاتھوں میں پاکستان کا سبز ہلالی پرچم تھامے، سیالکوٹ جلسہ میں شریک ہوں۔
خیال رہے کہ آج صبح رہنما پاکستان تحریک انصاف عثمان ڈار، عمر ڈار، حافظ حامد رضا، علی اسجد ملہی، سعید احمد بھلی، بیرسٹر جمشید غیاث اور دیگر مقامی لیڈرشپ سمیت پارٹی کارکنان کو گرفتار کرلیا گیا ہے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News