سابق وفاقی وزیر فواد چوہدری نے کہا ہے کہ پنجاب حکومت عارضی طور پر کام کررہی ہے جبکہ اقتدار اعلی کا فیصلہ عوام کو کرنا ہے۔

پی ٹی آئی رہنما فواد چوہدری نے پریس کانفرنس میں کہا ہے کہ سب سے اہم مسلئہ پنجاب میں بحران ہے جہاں 25 اراکین نے الیکشن میں باقاعدہ ووٹ دیا ہے، الیکشن کمیشن کو چایئے تھا کہ سب کو ایک ساتھ بلائے۔

ان کا کہنا تھا کہ الیکشن کمیشن نے آج نوٹسز دیئے ہیں اور ہمیں سمجھ نہیں آرہی کہ اتنے اہم معاملے کو اتنا سادہ کیسے لیا جا سکتا ہے۔

انہوں نے کہا ہے کہ اتنا بڑا صوبہ انتشار کا شکار ہے جس کو نارمل نہیں لیا جا سکتا ہے اس پر فوری نوٹس لینے کی ضرورت ہے۔

ان کا کہنا تھا کہ اس وقت ایک نام نہاد حکومت پنجاب میں چل رہی ہے اور ابھی تک کابینہ نہیں بن سکی ہے۔

انہوں نے کہا کہ پنجاب معاشی بحران میں چلا گیا ہے جس پر گورنر پنجاب نے جس طرح اسٹینڈ لیا ہے ہم ان کے شکر گزار ہیں۔

انہوں نے مزید کہا کہ یہ حکومت 20 مئی سے پہلے فارغ ہو جائے گی جس کے بعد عوام نے فیصلہ کرنا ہے کہ اقتدار کس کے پاس ہو گا۔

فواد چوہدری نے کہا کہ الیکشن کمیشن نے ہر حالت میں 90 دن کے اندر الیکشن کروانا ہے اور جو الیکشن نہیں کروا سکتا وہ عہدے سے استعفیٰ دے۔

ان کا کہنا تھا کہ آج عمران خان جلسوں کی سیکنڈ لیگ کا آغاز کر رہے ہیں جس میں عوام کا ریلا لانگ مارچ میں اسلام آباد کی طرف بڑھے گا۔