دنیا کی مقبول ترین ویڈیو شیئرنگ ایپلی کیشن ٹک ٹاک نے اپنے امریکی استعمال کنندگان کی معلومات محفوظ بنانے کے لیے ان کا سارا ڈیٹا اوریکل کے سرورزپرمنتقل کردیاہے۔

غیرملکی خبررساں ایجنسی رائٹرزکے مطابق امریکا کی قومی سلامتی کے ایک پینل نے ٹک ٹاک کے امریکی صارفین کے ڈیٹا کوامریکی حدود میں ہی موجود ڈیٹا سینٹرمیں محفوظ کرنے کے احکامات جاری کیے تھے۔

ویڈیوشیئرنگ ایپ کی ڈیویلپرکمپنی بائٹ ڈانس کا اس حوالے سے کہنا ہے کہ ہم نے ڈیٹا انٹیگریشن پرامریکی تحفظات کو دورکرتے ہوئے ایپ استعمال کرنے والے امریکی صارفین کا ڈیٹا اوریکل سرورزپرمنتقل کردیا ہے۔ اس سے قبل تمام صارفین کی معلومات کو ٹک ٹاک اپنے ڈیٹا سینٹرزمیں محفوظ کرتا تھا۔

رپورٹ کے مطابق دوسال قبل امریکی نیشنل سیکیورٹی پینل نے بائٹ ڈانس کو سلامتی خدشات پرامریکی صارفین کا ڈیٹا ملکی حدود میں قائم ڈیٹا سینٹرمیں ہی رکھنے کے احکامات دیے تھے۔ کیوں کہ امریکا کوخدشات لاحق تھے کہ کمیونسٹ چینی حکومت اس ڈیٹا تک رسائی حاصل کرسکتی ہے۔ تاہم، ان ہدایات پرعمل درآمد میں تقریبا دوسال کا عرصہ لگ گیا۔

امریکا میں ایپلی کیشن ڈیولپرزکی جانب سے استعمال کنندگان کے نجی ڈیٹا کی اسکروٹنی میں اضافہ کردیا گیا ہے، خاص طورپرامریکی افواج اورانٹیلی جنس سروس کے اہل کاروں کے ڈیٹا کے حوالے سے امریکا کو سخت تحفظات ہیں۔

سابق امریکی صدرڈونلڈ ٹرمپ نے اس حوالے سے کافی سخت ہدایات جاری کی تھیں۔ ٹک ٹاک کی جانب سے ڈیٹا کو اوریکل پرمنتقل کرنے کے حوالے سے وائٹ ہاؤس نے کوئی بیان جاری نہیں کیا ہے جب کہ وزارت خزانہ نے اس پر کسی بھی تبصرے سے انکار کردیا ہے۔

واضح رہے کہ ویڈیو شیئرنگ پلیٹ فارم ٹک ٹاک  دنیا کی مقبول ترین ایپ میں سے ایک ہے اور نئے سال کی پہلی سہہ ماہی میں مقبولیت میں ٹک ٹاک  نے انسٹا گرام، اسنیپ چیٹ اور اس زمرے کی دیگر ایپس کو پیچھے چھوڑ دیا تھا۔

مارکیٹ انٹیلی جنس فرم سینسرٹاورکی رپورٹ کے مطابق ٹک ٹاک دنیا بھرمیں سب سے زیادہ ڈاؤن لوڈ ہونے والی ایپلی کیشن بن گئی ہے۔

ٹک ٹاک کونئے سال کے ابتدائی تین ماہ میں  175 ملین بار ڈاؤن لوڈ کیا گیا، تاہم بھارت میں اس درجے میں انسٹا گرام ٹاپ پررہی۔ جس کی اہم وجہ بھارت میں ٹک ٹاک پرعائد پابندی ہے۔

تین ماہ میں صرف ایپل اسٹورپرہی اس ایپ کو 7 کروڑ مرتبہ ڈاؤن لوڈ کیا جاچکا ہے۔ یہ ایشیا میں ایک سہہ ماہی میں ہونے والا گیارہ فیصد اضافہ ہے۔

یہ بھی پڑھیں: ٹک ٹاک نے دنیا کے سب سے بڑے سرچ انجن کو پیچھے چھوڑ دیا

ٹک ٹاک کی خالق کمپنی بائٹ ڈانس کی ہی ایک اور ویڈیوایڈیٹنگ ایپلی کیشن کیپ کٹ بھی گزشتہ سہ ماہی میں 3 کروڑ سے زائد بار ڈاؤن لوڈ کی گئی۔ یہ گزشتہ پانچ کوارٹرزسے ایپ اسٹورزپرٹاپ ٹین میں ہے۔

رپورٹ کے اعداد وشمارسے ظاہر ہوتا ہے کہ اینڈروئیڈ اورآئی او ایس ایپلی کیشن ڈاؤن لوڈ کرنے والے ممالک میں بھارت سرفہرست رہا۔

عالمی گروتھ کے ساتھ ٹک ٹاک امریکا اوریورپ میں ایپل اورگوگل پلے اسٹورپرسب سے زیادہ ڈاؤن لوڈ ہونے ایپ کے طورپرظاہرہوئی۔

تاہم انسٹا گرام اورفیس بک نے ٹک ٹاک سے مقابلے کا سلسلہ جاری رکھتے ہوئے دوسرے اور تیسرے نمبرپربراجمان رہیں۔

مزید پڑھیں: اسمارٹ فون صارفین نے ایک سال میں 133 ارب ڈالر خرچ کردیے

گزشتہ سال کی پہلی سہہ ماہی میں ٹک ٹاک اور یوٹیوب ٹاپ 2 ایپس میں شامل تھیں، تاہم گزشتہ نو سہہ ماہی میں ٹک ٹاک نے ہرایک میں ایک کروڑ ڈاؤن لوڈز کا ہندسہ عبور کیا۔

رپورٹ میں بتایا گیا ہے کہ یورپ میں ٹیلی گرام اور واٹس ایپ کے درمیان سخت مقابلہ رہا۔ تاہم واٹس ایپ ڈاؤن لوڈزکے حساب سے ٹک ٹاک کے بعد دوسرے نمبرپررہی۔

ٹک ٹاک گزشتہ سال بھی دونوں ایپ اسٹورپرنان گیمنگ ایپس میں سب سے زیادہ ریونیو پیدا کرنے والی ایپلی کیشنز میں سرفہرست تھی۔

2021 میں ٹک ٹاک کو مجموعی طورپردونوں ایپ اسٹورزپر745 اعشاریہ 90 ملین بارڈاؤن لوڈ کیا گیا۔

دنیا کے بیش ترممالک میں پابندیوں کے باوجود تک ٹاک گزشتہ سال کی پہلی ششماہی میں 3 ارب ڈاؤن لوڈ رکھنے والی پہلی نان فییس بک اور نان گیمنگ ایپلی کیشن بن چکی تھی۔