گورنر سندھ نے کہا ہے کہ ماحول کو بہتر بنانے کے لئے شہریوں میں آگاہی بیدار کرنے کی ضرورت ہے۔

تفصیلات کے مطابق گورنرسندھ کامران خان ٹیسوری سے نیشنل فورم فار ہیلتھ اینڈ اینوائرمینٹ کے وفد کی ملاقات ہوئی ، وفدکی سربراہی فورم کے صدر نعیم قریشی کررہے تھے۔

ملاقات کے دوران صوبے میں فضائی آلودگی کے خاتمے کے اقدامات، سندھ کو سرسبز و شاداب بنانے کے منصوبے جبکہ اس ضمن میں شجر کاری کی اہمیت اور باہمی دلچسپی کے دیگر امور پر تبادلہ خیال کیا گیا۔

ملاقات میں نعیم قریشی نے گورنر سندھ کو فورم کے تحت شجرکاری اور ماحول کو بہتر بنانے کے دیگر منصوبوں سے آگاہ کیا۔

اس موقع پر گورنرسندھ کامران خان ٹیسوری نے کہا کہ تعلیم، صحت کے ساتھ ساتھ صوبے کو سرسبز و شاداب بنانے کے اقدامات میری ترجیحات میں شامل ہیں۔

کامران خان ٹیسوری نے کہا کہ سرسبز اور صاف ستھرے صوبہ سے نہ صرف ماحول بہتر ہوگا بلکہ فضائی آلودگی کم کرنے میں بھی مدد ملے گی اور اس شعبہ میں کام کرنے والی این جی اوز کی بھرپور حوصلہ افزائی کی جائے گی۔

گورنرسندھ کامران خان ٹیسوری نے مزید کہا کہ ماحول کو بہتر بنانے کے لئے شہریوں میں آگاہی بیدار کرنے کی ضرورت ہے، اس ضمن میں آپ جیسی این جی اوز اہم کردار ادا کرسکتی ہیں۔

دوسری جانب گورنر سندھ کامران ٹیسوری کی پیپلزپارٹی کی رہنما فریال تالپور سے ملاقات ہوئی جس میں صوبے کے مسائل کو حل کرنے کے لیے ساتھ مل کر کام کرنے پر اتفاق کیا گیا۔

ملاقات میں مجموعی سیاسی صورتحال صوبہ کی ترقی ، ترقیاتی منصوبے ، وفاقی تعاون، سیلاب متاثرین کی بحالی سمیت دیگر امور پر تبادلہ خیال کیا گیا۔

اس موقع پر گورنر سندھ کامران ٹیسوری نے کہا کہ پیپلز پارٹی صوبے میں تعلیمی معیار کی بہتری مفت تعلیم اور صحت کے حوالے سے سہولیات کو مزید بہتر بنانے کے لیے کام کرے سرد موسم میں سیلاب زدگان کو ہماری ضرورت ہے۔

کامران ٹیسوری نے کہا کہ جلد از جلد ریلیف کے کاموں کو مکمل اور سردی سے بچنے کی سہولیات ان تک پہنچائیں جائیں، صوبے کی ترقی کے لئے ہر ممکن اقدامات یقینی بنائے جائیں گے۔

گورنر سندھ کامران ٹیسوری نے مزید کہا کہ وفاق سے جو تعاون درکار ہوا وفاق صوبے کو فراہم کرے گا، وفاق و صوبہ کے درمیان پل کا کردار ادا کروں گا۔

ملاقات میں فریال تالپور نے کہا کہ شہر کی ترقی کے لئے صوبائی حکومت بھرپور اقدامات اٹھارہی ہے۔

پیپلزپارٹی کی رہنما فریال تالپور نے مزید کہا کہ صوبےکی ترقی میں گورنرسندھ کا وژن شاندار ہے، معاشی شہ رگ کراچی کو روشنیوں کا شہر بنائیں گے۔