خرم شیر زمان نے کہا ہے کہ میاں صاحب آئیں گے تو یہ قوم ایک ایک پیسے کا حساب لے گی۔

تفصیلات کے مطابق پی ٹی آئی پارلیمانی لیڈر سندھ اسمبلی و ڈپٹی سیکرٹری جنرل خرم شیر زمان نے رانا ثناء کی پریس کانفرنس پر ردعمل دیتے ہوئے کہا کہ رانا ثناء نے آج واضح بتایا کہ مفرور نوازشریف کو اب لایا جارہا ہے۔

انہوں نے کہا کہ یعنی اب این آر او 2 کا دوسرا سیزن قوم کیلئے شروع ہونے جارہا ہے، نوازشریف کی پارٹی میاں مفرور کی قیادت کے بغیر غیرتسلی بخش ہے۔

ان کا کہنا تھا کہ ن لیگ کے پاس عوام میں جانے کیلئے اب کوئی منگھڑت بیانیہ باقی نہیں رہا، جسے چیخ چیخ کر ن لیگ نے وطن کی مٹی کا بیٹا قراردیا وہ یورپ میں سیرسپاٹے کررہا ہے۔

پی ٹی آئی پارلیمانی لیڈر سندھ اسمبلی کا یہ بھی کہنا تھا کہ میاں صاحب کی پلیٹوں کا علاج پاکستانی عوام کے پاس ہے، میاں صاحب آئیں گے تو یہ قوم ایک ایک پیسے کا حساب لے گی۔

خرم شیر زمان نے کہا کہ عمران خان کو اپنی جان سے زیادہ اس ملک کی فکر ہے،59 فیصد عوام کو یقین ہےعمران خان ملک کو بحران سے نکالے گا۔

انہوں نے یہ بھی کہا کہ رانا ثناء عمران خان کی جان  سے متعلق ڈرانے کے بجائے سیکورٹی کے انتظامات سخت کریں۔

پی ٹی آئی پارلیمانی لیڈر سندھ اسمبلی و ڈپٹی سیکرٹری جنرل خرم شیر زمان نے مزید کہا کہ فیض آباد میں پی ٹی آئی جلسے کی تیاریوں میں رکاوٹیں پی ڈی ایم کی بوکھلاہٹ کا ثبوت ہے، الیکشن کے اعلان سے قبل کسی قسم کی ٹیبل ٹاک حکومت کے ساتھ ممکن نہیں۔

واضح رہے اس سے قبل وزیر داخلہ رانا ثناءاللہ نے نیوز کانفرنس سے خطاب کرتے ہوئے کہا تھا کہ پاکستان کی مشکلات کا حل کامیابی اور ترقی کا راز اس میں ہے  کہ قانون اور آئین کی پاسداری ہو۔

رانا ثناءاللہ نے کہا کہ تمام ادارے اپنی آئنی حدود میں رہ کر کام کر رہے ہیں لیکن ایک سیاسی راہنما نے چیلنج کیا اور طعنہ زنی سے لے کر گالم گلوچ تک گئے، جھوٹی آزادی کے لیے جدو جہد کی اور مسلح افواج کو تنقید کا نشانہ بنایا گیا۔

انہوں نے یہ بھی کہا کہ اس سال آرمی کے نئے چیف کی تعیناتی ہونی تھی اس لیے اس دھرنے کا ڈھونگ رچایا گیا لیکن پھر بھی پاک فوج کے بہترین سپوت نے فوج کے سربراہ کا عہدہ سنبھالا ہے اور ہم انہیں مبارک باد پیش کرتے ہیں اورامید کرتے ہیں کہ وہ اپنی ذمہ داریاں احسن طریقے سے سر انجام دیں گے۔

وزیر داخلہ رانا ثناءاللہ نے مزید کہا کہ میں نے انتظامیہ کو ہدایات جاری کی ہیں کہ جلسہ گاہ کے باہر سخت حفاظتی انتظامات کئے جائیں اور اسٹیج کو بلٹ پروف بنایا جائے۔