متحدہ عرب امارات کی ریاست دبئی میں برج خلیفہ کے نزدیک واقع ایک عمارت کی 35 ویں منزل میں خوفناک آتشزدگی کا واقعہ پیش آیا۔

تفصیلات کے مطابق دنیا کی سب سے بلند عمارت برج الخلیفہ کے قریب واقع ایک کثیرمنزلہ بلڈنگ میں آج صبح آگ لگ گئی، تاہم فوری طور پر کسی جانی نقصان کی اطلاع نہیں ہے۔

خبر رساں ادارے کے مطابق دبئی میں ایک رہائشی عمارت کی 35 ویں منزل پر آگ لگی ہے جس کے بعد وہاں سے اٹھنے والے دھویں کو دیکھا جا سکتا ہے۔

متاثرہ عمارت اس جگہ پر واقع ہے جہاں متحدہ عرب امارات کی نامور کنسٹرکشن کمپنی ’ایمار‘ گروپ کی تعمیر کردہ کئی دیگر عمارتیں موجود ہیں جنہیں 8 بولیورڈ والک بھی کہا جاتا ہے۔

دبئی پولیس اور شہری دفاع کے ادارے نے فوری طور پر آگ لگنے کے معاملے پر کوئی تبصرہ نہیں کیا ہے جب کہ ایمار گروپ نے بھی رابطہ کرنے پر فوری طور پر کوئی جواب نہیں دیا۔

واضح رہے کہ دبئی کی کثیر منزلہ عمارتوں میں حالیہ عرصے کے دوران آتش زدگی کے واقعات کے بعد عمارتوں میں استعمال ہونے والے مٹیریل پر سوالات اٹھائے جاتے رہے ہیں.

واضح رہے کہ 2015 میں سالِ نو کے جشن کے موقع پر دبئی کے ڈاؤن ٹاؤن میں آگ بھڑکنے کا واقعہ پیش آیا تھا۔

ڈاؤن ٹاؤن برج الخلیفہ کے قریب ہوٹلوں اور رہائشی عمارتوں پر مشتمل علاقہ ہے، جہاں دنیا بھر سے سیرسپاٹے کی غرض سے دبئی آنے والے سیاح قیام کرتے ہیں۔