منی لانڈرنگ کیس میں احتساب عدالت نے وزیراعظم شہباز شریف کے صاحبزادے حمزہ شہباز کی پیشی سے استثنی کی درخواست بھی منظور کرلی۔
تفصیلات کے مطابق لاہور کی احتساب عدالت میں وزیراعظم شہباز شریف اور حمزہ شہباز سمیت دیگر ملزمان کیخلاف منی لانڈرنگ ریفرنس پر سماعت ہوئی۔
احتساب عدالت نے منی لانڈرنگ ریفرنس پر سماعت 7 مارچ تک ملتوی کرتے ہوئے حمزہ شہباز کی پیشی سے استثنی کی درخواست بھی منظورکرلی۔
عدالت نے حکم دیا کہ نیب تفتیش مکمل کرکے نئے ملزمان کی حد تک جلد سپلیمنٹری ریفرنس دائر کرے۔ جب تک نئے ملزمان کا سپلیمنٹری ریفرنس دائر نہیں ہوتا پرانے ملزمان کا ٹرائل رکا رہے گا۔
سماعت کے دوران نیب نے تفتیش مکمل کرنے کیلیے ایک ماہ کی مہلت مانگی جس پرعدالت نے کہا کہ اتنی مہلت نہیں دی جا سکتی ہے جلد تفتیش مکمل کریں۔
دوسری جانب لاہورکی احتساب عدالت میں وزیراعظم پاکستان کے داماد ہارون یوسف کی عبوری ضمانت میں یکم مارچ تک توسیع کردی۔
عدالت نے شریک ملزم سید طاہر نقوی کی عبوری ضمانت میں بھی یکم مارچ تک توسیع کر دی اور دونوں ملزموں سے تفتیش سے متعلق پیش رفت جلد مرتب کرنے کا حکم دے دیا۔
احتساب عدالت نمبر 9 کے جج قمر الزمان نے سماعت کی۔
تفتیشی افسر نے عدالت کو بتایا کہ کیس میں ہارون یوسف اور طاہر نقوی کے بے نامی دار کردار سے بارے جائزہ لے رہے ہیں مزید تفتیش کیلئے مہلت دی جائے، ہارون یوسف اور سید طاہر نقوی کی گرفتاری مطلوب نہیں ہے۔
تفتیشی نے یہ بھی بتایا کہ دونوں ملزموں کے پرانے وارنٹ گرفتاری ابھی منسوخ نہیں ہوئے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News