آفتاب صدیقی نے کہا ہے کہ عوام الیکشن میں بھرپور بلے کا ساتھ دیں۔

تفصیلات کے مطابق مظاہرے سے خطاب کرتے ہوئے کراچی ڈویژن کے صدر آفتاب صدیقی نے کہا کہ کل پنجاب میں پولیس نے بےشرمی کا مظاہرہ کیا، کل عمران خان کے نکلنے کے بعد گیدڑ  اس کے گھر میں گھس گئے، منشیوں نے جس طرح حملہ کیا اس کی مذمت کرتے ہیں۔

آفتاب صدیقی نے کہا کہ پنجاب پولیس نے چادر اور چار دیواری کا تقدس پامال کیا، مہنگائی کی صورتحال سب کے سامنے ہیں، مریم اب صوبائی الیکشن لڑیں گی جو قیدی اور نااہل ہیں۔

انہوں نے یہ بھی کہا کہ میں کراچی کے صدور ، عہدیداران کا شکر گزار ہوں، کراچی میں دو الیکشن ہونے جارہے ہیں، عوام الیکشن میں بھرپور بلے کا ساتھ دیں۔

پی ٹی آئی کراچی کے صدر کا کہنا تھا کہ انشاللہ اب 11 یوسیز کا نتائج وہ نہیں جو پہلے تھا،18 اپریل کو 11 یوسیز پر الیکشن ہوگا اس روز طاق راتیں ہوں گی۔

ان کا یہ بھی کہنا تھا کہ ارسلان تاج کو گھر سے اغواء کیا گیا، ہم نے احتجاج کیا تو پھر معلوم ہوا کہ اسے نامعلوم افراد میں شامل کرکے مقدمہ بنایا۔

انہوں نے کہا کہ شاہ نواز جدون کو گرفتار ، راجا اظہر کےخلاف اشتعال انگیز تقاریر پر مقدمہ کیا ، گرفتار کارکن کو کہا کہ اس کا کان کاٹ دیں گے۔

آفتاب صدیقی کا کہنا تھا کہ ارسلان تاج سے دو دفعہ ابتک ملاقات ہوئی ہےکہتے ہیں سندھ حکومت کی طرف سے اجازت نہیں تو سندھ حکومت کو بتادیں مقافات عمل بھی ہوتا ہے۔

 پی ٹی آئی کراچی کے صدر آفتاب صدیقی کا مزید کہنا تھا کہ ہمارے لیڈر نے پرامن احتجاج کرنے کی پالیسی دی ہے، ہم احتجاج تب تک کریں گے جب تک انصاف کا بول بالا نہیں ہوتا۔