پینٹاگون نے دعویٰ کیا ہے کہ امریکی بحریہ نے یمن سے اسرائیل پر ممکنہ میزائل حملہ ناکام بنا دیا ہے۔

برطانوی خبر رساں ادارے کی خبر کے مطابق امریکی بحریہ کے ایک جنگی جہاز نے یمن سے ایرانی حمایت یافتہ حوثی تحریک کی جانب سے داغے گئے میزائلوں اور ڈرونز کو ناکام بنا دیا ہے۔

پینٹاگون کے ترجمان کا کہنا ہے کہ یہ میزائل ممکنہ طور پر اسرائیل کے اہداف کی جانب داغے گئے تھے۔

رپورٹس کے مطابق یو ایس ایس کارنی نامی گائیڈڈ میزائل تباہ کن جہاز جمعرات کے روز شمالی بحیرہ احمر میں کام کر رہا تھا۔

پینٹاگون نے یہ بھی کہا ہے کہ حالیہ دنوں میں عراق اور شام میں موجود امریکی فوجیوں پر کئی بار حملے کیے گئے ہیں۔

اسرائیل کی جانب سے غزہ میں حماس کے ٹھکانوں پر حملوں کے پیش نظر واشنگٹن ایران کے حمایت یافتہ گروہوں کی سرگرمیوں کے لیے الرٹ ہے۔

پینٹاگون کے بریگیڈیئر جنرل پیٹرک رائیڈر نے بتایا کہ یمن سے داغے جانے والے تین کروز میزائل اور متعدد ڈرون مار گرائے گئے ہیں۔

بریگیڈیئر جنرل پیٹرک رائیڈر نے کہا کہ اس واقعے میں کسی کے زخمی ہونے کی اطلاع نہیں ہے اور ایک امریکی عہدیدار نے کہا ہے کہ ایسا لگتا ہے کہ جنگی جہاز ہدف نہیں تھا۔

بریگیڈیئر جنرل پیٹرک رائیڈر نے نامہ نگاروں کو بتایا کہ ہم یقینی طور پر یہ نہیں کہہ سکتے کہ یہ میزائل اور ڈرون کس چیز کو نشانہ بنا رہے تھے، لیکن یہ یمن سے داغے گئے، بحیرہ احمر کے ساتھ شمال کی طرف بڑھ رہے تھے جہاں اسرائیل واقع ہے۔

پینٹاگون کا کہنا ہے کہ عراق میں امریکی اور دیگر بین الاقوامی افواج کے متعدد اڈوں پر ڈرونز اور راکٹ داغے گئے ہیں۔

واضح رہے کہ عراقی عسکریت پسند گروپوں نے امریکہ کو غزہ میں حماس کے خلاف اسرائیلی کارروائیوں کی حمایت کرنے کے خلاف متنبہ کیا تھا۔

مشرق وسطیٰ میں امریکہ کے مختلف اڈے موجود ہیں جن میں جنگی جہاز، فوجی اور لڑاکا طیارے موجود ہیں۔

گزشتہ ایک ہفتے کے دوران امریکہ نے مشرق وسطیٰ میں دو طیارہ بردار بحری جہاز، تقریبا دو ہزار میرین اور معاون بحری جہاز بھیجے ہیں۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں