وفاقی وزیر داخلہ محسن نقوی نے وزیر اعلیٰ کے پی کے علی امین گنڈا پور سے ملاقات کی۔

ملاقات میں صوبے میں امن و امان اور سیکیورٹی کی صورتحال پر تبادلہ خیال کیا گیا اور دہشتگردی کے ناسور کے مکمل خاتمے کے عزم کا اعادہ کیا گیا۔

ملاقات میں دونوں رہنماؤں نے دہشتگردوں کے خلاف انٹیلی جنس بیسڈ آپریشن مزید تیز کرنے کا فیصلہ کیا۔

محسن نقوی اورعلی امین گنڈا پور نے چینی شہریوں کی ہلاکت پرافسوس کا اظہار کیا اور چینی شہریوں کے خاندانوں سے مکمل یکجہتی کا اظہار کیا اور حملے کے سہولت کاروں کو کیفر کردار تک پہنچانے کا عزم کا اظہار کیا۔

محسن نقوی نے کہا کہ چینی شہریوں پر حملے کےعناصر قرار واقعی سزا سے نہیں بچ سکیں گے، انہوں نے دہشتگردی سے نمٹنے کے لیے موثر رابطوں کی ہدایت کی۔

وفاقی وزیر داخلہ محسن نقوی نے مزید کہا کہ پوری طاقت سے ملک دشمنوں کو جواب دیں گے، دہشتگردی کے خلاف جنگ پاکستان کی بقا کی جنگ ہے، خیبر پختونخوا کے ساتھ ہر ممکن تعاون کریں گے۔

اس موقع پر خیبر پختونخواہ کے وزیر اعلیٰ علی امین گنڈا پور نے کہا کہ خیبرپختونخوا دہشتگردی سے سب سے زیادہ متاثرہوا ہے۔