کراچی میں ڈاکو راج برقرار ہے اور آج پاکستان سول ڈیفینس سے وابستہ زخمی نوجوان جان کی بازی ہار گیا۔ 

تفصیلات کے مطابق اورنگی ٹاؤن 15سی میں ڈاکوؤں کی فائرنگ سے زخمی ہونے والا فرحان دم توڑ گیا۔

فرحان کے اہلخانہ کے مطابق مقتول فرحان تین روز قبل گھر کے باہر ڈاکوؤں کی فائرنگ سے زخمی ہوا تھا، موٹر سائیکل سوار دو ملزمان گلی میں داخل ہوئے اور فرحان پر پستول تان لی۔

اہلخانہ نے کہا کہ مقتول فرحان پاکستان سول ڈیفینس ادارے سے وابستہ اور فوٹوگرافر تھا، فرحان کے قتل کے بعد مدعی خوفزدہ، مقدمہ بھی واپس لینے ارادہ رکھتا تھا۔

فرحان کے بھائی ذیشان کا کہنا تھا کہ فرحان نے بھی اپنا لائسنس یافتہ پستول نکال لیا، جسے دیکھتے ہی ایک ملزم نے فائرنگ کردی، موٹر سائیکل سوار ملزمان فرحان کا پستول بھی لیکر فرار ہوئے۔

پاکستان بازار پولیس نے واقعے کو دشمنی کا شاخسانہ قرار دے دیا۔ رواں سال ڈکیتی مزاحمت پر جاں بحق افراد کی تعداد 41 تک پہنچ گئی ہے۔

دوسری جانب وزیر داخلہ، قانون و پارلیمانی امور ضیاءالحسن لنجار نے واقعہ کا نوٹس لے لیا۔

وزیر داخلہ، قانون و پارلیمانی امور ضیاءالحسن لنجار نے ایڈیشنل آئی جی کراچی پولیس سے واقعہ کی تفصیلی رپورٹ طلب کرلی۔

وزیر داخلہ، قانون و پارلیمانی امور ضیاءالحسن لنجار کی فرحان کے اہل خانہ سے دلی تعزیت اور افسوس کا اظہار کیا۔

وزیر داخلہ سندھ ضیاءالحسن لنجار نے ایڈیشنل آئی جی کراچی کو ہدایت کی کہ مجھے فرحان کے قاتلوں کو قانون کے کٹہرے میں لاکر رپورٹ دی جائے۔ بے گناہ شہریوں کو موبائل چوروں کے رحم و کرم پر نہیں چھوڑ سکتے۔

وزیر داخلہ سندھ ضیاءالحسن لنجار نے کہا کہ فائرنگ کے واقعہ میں ملوث عناصر کو گرفتار کرکے قانون کے مطابق سزا دی جائے گی۔