وفاقی وزیر خواجہ آصف کا کہنا ہے کہ 9 مئی کو ریڈ لائن عبور کی گئی اور ایک سیاسی جماعت نے منصوبہ بندی کے تحت یہ سازش تیار کی۔ 

وزیر دفاع خواجہ آصف نے میڈیا سے گفتگو کرتے ہوئے کہا کہ چند روز بعد نو مئی کو ایک سال مکمل ہو جائے گا، اس دن پنجاب اور کے پی کے میں فوجی تنصیبات کو نقصان پہنچایا گیا، اس حملے میں تحریک انصاف کی قیادت شامل تھی۔

انہوں نے کہا کہ ایک منصوبے کے تحت فوجی تنصیبات پر حملہ کیا گیا، کور کمانڈر لاہور ، میانوالی ائیر بیس اور جی ایچ کیو راولپنڈی کو نشانہ بنایا گیا، اس میں سینکڑوں لوگ گرفتار بھی ہوئے، اس دن ریڈ لائن کو عبور کیا گیا۔

وزیر دفاع کا کہنا تھا کہ ایک سیاسی جماعت نے منصوبہ بندی کے تحت یہ سازش تیار کی ، بد ترین دشمن بھارت نے بھی ایسی سازش نہیں تیار کی جس طرح اندرون ملک کی گئی۔

انہوں نے کہا کہ جن لوگوں نے تنصیبات پر حملہ کیا اور حقیقی آزادی کے نعرے لگائے، کل انہوں نے تین رکنی کمیٹی بنائی اور اعلان کیا کہ ہم اسٹیبلشمنٹ کے ساتھ مذاکرات کریں گے، جن لوگوں نے فوج میں بغاوت کروانے کی کوشش کی، اب وہی لوگ مذاکرات مانگ رہے ہیں۔

خواجہ آصف کا کہنا تھا کہ اسٹیبلشمنٹ کے ساتھ سیاسی جماعتوں کو اختلافات رہے، مختلف اوقات میں اسٹیبلشمنٹ کی حکومت رہی۔

انہوں نے کہا کہ عمران خان فضل الرحمان کے خلاف غلیظ زبان استعمال کی، اب وہ کہہ رہے ہیں کہ سیاست میں کبھی مزاکرات کے دروازے بند نہیں ہوتے، ان کی حکومت میں یہ کسی کے ساتھ بیٹھنے کو تیار نہیں تھے، عمران خان نے کسی کے ساتھ مذاکرات نہیں کیے۔