پاکستان تحریک انصاف کی رہنما یاسمین راشد کا کہنا ہے کہ مسلم لیگ ن کے لیڈر رہائی کیلئے ڈیل کرتے ہیں لیکن پی ٹی آئی ڈیل نہیں کرے گی۔ 

انسداد دہشت گردی عدالت لاہور میں پی ٹی آئی رہنماؤں ڈاکٹر یسمین راشد، صنم جاوید اور میاں محمود الرشید کے خلاف ن لیگ کا آفس جلانے کے دو مقدمات کی سماعت ہوئی۔

سابق صوبائی وزیر ڈاکٹر یسمین راشد، صنم جاوید ،اعجاز چوہدری سمیت دیگر پی ٹی آئی رہنماؤں کو جیل سے عدالت میں پیش کیا گیا۔ صنم جاوید کو سرگودھا جیل سے حاضری کیلئے پیش کیا گیا۔

انسداد دہشتگردی عدالت کے ارشد جاوید چدھڑ نے سماعت کی۔ ملزمان کیخلاف ماڈل ٹاؤن میں مسلم لیگ نون کا آفس کے جلانے کے دو مقدمات ہیں۔ مقدمات میں ملزمان پر بغاوت اور عوام کو فسادات پر اکسانے کا الزام ہے۔

عدالت نے آئندہ سماعت پر ملزمان کو فرد جرم عائد کرنے کیلئے طلب کرتے ہوئے کیس کی سماعت 8 مئی تک ملتوی کردی۔

بعد ازاں انسداد دہشتگردی عدالت لاہور کے باہر میڈیا سے غیر رسمی گفتگو کرتے ہوئے سابق صوبائی وزیر ڈاکٹر یاسمین راشد نے کہا کہ مریم نواز آپ کو مبارک ہو آپ پولیس میں بھرتی ہو گئی ہیں، اگر آپ بھرتی نہیں ہوئی تو پولیس کی یونیفارم پہنچا جرم ہے۔

انہوں نے مطالبہ کیا کہ مریم نواز کیخلاف کاروائی ہونی چاہے کیوں کہ پولیس کی یونیفارم پہننے کی قانون میں سزا ہے اور آئی جی اس غفلت کا زمہ دار ہے، جو بندہ پولیس میں نہ ہو اور یونیفارم ہہنے وہ مجرم کرتا ہے۔

یاسمین راشد کا کہنا تھا کہ مسلم لیگ ن کے لیڈر رہائی کیلئے ڈیل کرتے ہیں لیکن پی ٹی آئی ڈیل نہیں کرے گی، رانا ثناء اللہ ہمیں ڈیل کا مشورہ نہ دے ہم تمہاری طرح نہیں ہیں، اگر ہمیں ڈیل کرنی ہوتی تو اب تک ہم رہا ہو چکے ہوتے۔

انہوں نے کہا کہ ہمارا لیڈر رہائی کیلئے ڈیل نہیں کرے گا اس کی یہی بات تو اچھی ہے، ہم نے ڈیل کرنی ہوتی تو ہم ایک سال سے جیل نہ کاٹ رہے ہوتے، میری ضمانت کی درخواستوں پر پراسیکیوشن کاروائی نہیں ہونے دے رہی۔

پی ٹی آئی رہنما کا مزید کہنا تھا کہ کئی ماہ سے میری ضمانت کی درخواستوں پر فیصلہ نہیں ہو رہا، صنم جاوید اور عالیہ حمزہ نے پی ٹی آئی کو چار چاند لگا دیئے ہیں، صنم جاوید اور عالیہ حمزہ مزاحمت کی علامت بن گئی ہیں۔

انہوں نے کہا کہ جیل کی سختیاں صنم جاوید اور عالیہ حمزہ کا جزبہ کم نہیں کر سکیں، صنم جاوید اور عالیہ حمزہ نے سیاسی ظلم کا ڈٹ کر مقابلہ کیا ہے، صنم جاوید آج بھی سرگودھا جیل سے مسکراتی ہوئی عدالت میں پیش ہوئی ہے۔