وفاقی وزیر پیٹرولیم مصدق ملک نے کہا ہے کہ عوامی حق میں آئین سازی اس وقت ضروری ہے۔

وفاقی وزیر پیٹرولیم مصدق ملک نے میڈیا سے گفتگو کرتے ہوئے کہا کہ عوام کو مبارک باد دوں گا کہ آج کے الیکشن کے بعد دونوں ہاؤس مکمل ہو جائیں گے اور قانون سازی کا پراسیس دوبارہ رواں دواں ہو جائے گا۔

مصدق ملک نے کہا کہ جب دونوں ہاؤسز بحال ہوجاتے ہیں تو عوام کا مقدمہ سامنے آجاتا ہے، عوامی حق میں آئین سازی اس وقت ضروری ہے۔

انہوں نے یہ بھی کہا کہ مہنگائی کے بارے میں خصوصی اقدامات کرنے ہیں، جمہوریت کا یہی مقصد ہے کہ جو آواز سڑک پر نظر آتی ہے اسے پارلیمان تک پہنچانا۔

وفاقی وزیر پیٹرولیم کا کہنا تھا کہ عوامی مقدمہ پارلیمان میں لانا فرض ہے جبکہ حکومت کا فرض ہے کہ عوام کے حق میں آئین سازی کرے۔ دیگر پارٹیوں کا شکریہ جو آج ہماری حمایت کررہی ہیں، امید ہے ہمارے تمام امیدوار کامیاب ہونگے۔

 ان کا یہ بھی کہنا تھا کہ پیپلز پارٹی کا شکریہ جنہوں نے ہمارا ساتھ دیا، ہمیں تین ٹارگٹ دیئے گئے ہیں لیکن اس وقت بہت بڑا مسئلہ قوت خرید ہے جبکہ تیل کی قیمتیں آئے دن بدل جاتی ہیں، خام تیل کی قیمت عالمی منڈی میں مسلسل اوپر نیچے ہو رہی ہے۔

  مصدق ملک نے کہا کہ روس ، یوکرین کے درمیان جنگ کی فزا ، اسرائیل کی بربریت سے عالمی منڈی میں غیر یقینی صورتحال ہے، اس صورتحال میں پاکستان جیسے ممالک کو مشکلات کا سامنا کرنا پڑتا ہے۔

وفاقی وزیر پیٹرولیم مصدق ملک نے مزید کہا کہ وزیر اعظم نے سستی توانائی کی دستیابی کو یقینی بنانے کی ہدایت کی ہے، ہم خام تیل ڈالر میں خریدتے ہیں، ڈالر کی قیمت بڑھ جائے اور روپیہ سستا ہو جائے تو ہمیں دوگنا نقصان ہوتا ہے، جب سے عوامی حکومت آئی ہے جبکہ ڈالر اور روپے کے تناسب میں کچھ استحکام آیا ہے۔