وزیراعلیٰ خیبرپختونخوا علی امین گنڈاپور نے سینیٹ انتخابات ملتوی کرنے کیخلاف احتجاج کا اعلان کیا ہے۔

وزیراعلیٰ خیبرپختونخوا علی امین گنڈاپور نے میڈیا سے گفتگو کرتے ہوئے کہا کہ الیکشن سے متعلق آر او کے پاس کرنے جارہا ہوں، سینیٹ انتخابات اگر ملتوی ہوئے تو بھرپور احتجاج ہوگا

انہوں نے کہا کہ غیر قانونی طور پر مخصوص نشستوں پر منتخب اراکین نے ملتوی کرنے کی درخواست دی تھی، انتخابات ملتوی کرنے کے خلاف بھرپور احتجاج ریکارڈ کریں گے۔

علی امین گنڈاپور نے یہ بھی کہا کہ میرے لیڈر نے مجھے سکھایا ہے کہ اپنے حق کےلیے لڑنا ہے،25 اراکین کو الیکشن کمیشن نےغیر قانونی طور پر نشستیں دی ہے، پارٹی چیئرمین نے ایک بات سیکھائی ہے ہم لڑیں گے۔

ان کا کہنا تھا کہ عوام نے ہمیں مینڈیٹ دیا ہے، اس ملک میں بار بار آئین کو توڑا جا رہا ہے، ہماری سیٹیں ہمیں نہیں دی گئیں جبکہ ہمارے پارٹی الیکشن کو متنازع بنا کر ہمیں نشان نہیں دیا گیا، میں واضح کرتا ہوں کہ ہم لڑیں گے، ہم آخری حد تک جائیں گے جبکہ ہم ان غیرقانونی لوگوں کو حلف نہیں اٹھانے دیں گے۔

وزیراعلیٰ خیبرپختونخوا علی امین گنڈاپور کا مزید کہنا تھا کہ آج ہماری پارلیمانی پارٹی کا اجلاس بھی ہے، ہماری درخواست پر کمیشن کیوں نہیں بنایا گیا، ہماری سیٹیں اپوزیشن کو کیوں دی گئی ہیں؟ خواتین کی حق تلفی نہیں ہونے دینگے جبکہ آئین کے ساتھ کھڑا ہونے کی ضرورت ہے، آج پارلیمانی پارٹی کا اجلاس 8 بجے طلب کیا ہے قرار داد پاس کرینگے۔